මෙරට කාන්තාවන්ට සිදු වූ වෙනස්කම් හා අයිතිවාසිකම් කඩවීම් සොයා බැලීමට විශේෂ කාරක සභාවක් පත් කරන්නැයි පාර්ලිමේන්තුව නියෝජනය කරන සියලු මන්ත්‍රීවරියන් කතානායකවරයාගෙන් ඉල්ලීමක් කරයි.
පාර්ලිමේන්තුවේ සන්නිවේදන දෙපාර්තමේන්තුව නිකුත් කළ නිවේදනයක දැක්වෙන්නේ, රාජ්‍ය අමාත්‍ය විශේෂඥ වෛද්‍ය සුදර්ශනී ප්‍රනාන්දුපුල්ලේ මහත්මියගේ සභාපතිත්වයෙන් යුත් පාර්ලිමේන්තු මන්ත්‍රිවරියන්ගේ සංසදය කතානායකරයාගෙන් මේ පිළිබඳ ලිඛිත ඉල්ලීමක් කළ බවයි.
මෙම යෝජනාව පාර්ලිමේන්තු න්‍යාය පුස්තකය හා සම්බන්ධ පරිපූරකයට ද පාර්ලිමේන්තු මහ ලේකම්වරයා විසින් ඇතුළත් කර ඇති බව අදාළ නිවේදනයේ සඳහන් ය.
එම විශේෂ කාරක සභාව මගින් රැකියා, උසස් වීම් අවස්ථා හා සේවා ස්ථානයේදී සිදුවන හිංසනයන් ඇතුළුව ස්ත්‍රී පුරුෂ සමාජභාවය මත පදනම්ව කරනු ලබන සියලු ආකාරයේ වෙනස් කොට සැලකීම් පිළිබඳ කාන්තාවන්ගේ දුක්ගැනවිලි විභාග කර බැලීම, සියලු අංශවලට ප්‍රමාණවත් අභ්‍යන්තර සම්පත් වෙන්කර දීම ඇතුළු යෝජනා 10 ක් ඉටු කළ යුතු බව ද මන්ත්‍රිවරියන්ගේ සංසදය කතානායකවරයාට දැනුම් දී තිබේ.