හිරු රූපවාහිනියේ ඊයේ රාත්‍රියේ පැවැත්වුණු “බලය“ දේශපාලන වැඩසටහනේදී රාජ්‍ය අමාත්‍ය සුජීව සේනසිංහ මහතා සහ කෝප් කමිටු සභාපති සුනිල් හදුන්නෙත්ති මහතා අතර උණුසුම් අදහස් හුවමාරුවීක් සිදුවිය.
බැදුම්කර චූදිතයන් වෙනුවෙන් දිගින් දිගටම පෙනී සිටි සුජීව සේනසිංහ රාජ්‍ය අමාත්‍යවරයා කියා සිටියේ බැදුම්කර ගනුදෙනුවට හිටපු මහබැංකු අධිපති අර්ජුන් මහේන්ද්‍රන් වැරදිකරුවෙකු බව කෝප් කමිටු වාර්තාවේ සටහන් වී නැති බවයි. එසේ සදහන් කර ඇතිනම් පෙන්වන ලෙසද ඇමති සේනසිංහ ඉල්ලීය.
“ප්‍රස්තුත බැදුම්කර ගනුදෙනුව සදහා හිටපු මහබැංකු අධිපති අර්ජුන් මහේන්ද්‍රන් මහතා සෘජුවම වගකිව යුතු අතර ඔහුට හා අදාල නිලධාරීන්ට එරෙහිව නීතිමය ක්‍රියාමාර්ග ගැනීමට නිර්දේශ කරයි“ යන්න කෝප් වාර්තාව උපුටා දක්වමින් හදුන්නෙත්ති මහතා පවසද්දී සූජීව සේනසිංහ අමාත්‍යවරයා කියා සිටියේ, බැදුම්කර ගනුදෙනුවට අර්ජුන් මහේන්ද්‍රන් වගකිව යුතු බව සදහන් වීමෙන් ඔහු වරදකරුවකු වන බව නොකියවෙන බවයි.
අදාළ කෝප් කමිටු වාර්තාවට එජාප සාමාජිකයන් පාද සටහන් යෙදීමට කෝප් කමිටු සභාපති හදුන්නෙත්ති මහතා විරෝධය නොදැක්වූ බවද ඔහු කියා සිටියේය.