පළාත් පාලන මැතිවරණයේදී පරාජයට පත්වන පළාත් පාලන ආයතනවලට අදාළ මැතිවරණ කොට්ඨාසවල සංවිධායකයන් සම්බන්ධයෙන් දැඩි තීරණයක් ගැනීමට සිදුවන බව එජාප නායක හා අග්‍රාමාත්‍ය රනිල් වික්‍රමසිංහ මහතා ප්‍රකාශ කර ඇත.
එබැවින් මේ පිළිබඳව සිය අවධානය යොමු කරන ලෙසත් එවැනි සංවිධායකයන් සම්බන්ධයෙන් ගනු ලබන තීරණ යළි කිසිදු අයුරකින් වෙනස් නොකරන බවටත් අග්‍රාමාත්‍යවරයා එජාප සංවිධායකයන්ට අනතුරු ඇඟවීමක්ද සිදුකර ඇත.
තමන්ගේ ආසනයට අදාළ පළාත් පාලන ආයතන පරාජය වී මෙහාට එන්න එපා යැයි අග්‍රාමාත්‍යවරයා එහිදී ඔවුන්ට දැනුම් දී තිබේ. එජාප නායක වික්‍රමසිංහ මහතා මේ බව සඳහන් කෙළේ එජාප මූලස්ථානයට කැඳවූ පක්ෂ සංවිධායකවරුන්ගේ හමුවේදීය.
ශ්‍රී ලංකා නිදහස් පක්ෂය හා එක්සත් ජාතික පක්ෂය සම්මුතියක් ඇතිව ගෙන යන මෙම රජය එක්සත් ජාතික පාක්ෂිකයන්ට කරන කෙනහිලිකම් නිසා තමන් මුහුණ දී ඇති අපහසුතා හා පීඩාවන් පිළිබඳව රනිල් වික්‍රමසිංහ මහතා මෙයින් ඔබ්බට කල්පනා නොකිරීමෙන් තමන් පත් වී ඇති අපහසුතාව පිළිබඳව එජාප මන්ත්‍රිවරුන් රැසක් එහිදී විරෝධතාව දක්වා ඇතැයිද අනාවරණය වෙයි.