ඇමරිකානු ඩොලර් මිලියන සියයක් වටිනා අති නවීන ගෙපාර්ඩ් 5.1 වර්ගයේ යුද නෞකාවක් රුසියාවෙන් මිලදී ගැනීමට දෙසැම්බර් 31 වැනිදාට පෙර ඇනවුම් කරන බව රාජ්‍ය ව්‍යවසාය සංවර්ධන රාජ්‍ය අමාත්‍ය ලක්ෂමන් යාපා අබේවර්ධන මහතා පවසයි.
මෙම යුද නෞකාව වසර 50ක 60ක අතර කාලයක් මුහුදේ සිට අප රට ආරක්ෂා කිරීමට හැකි නෞකාවක් බවද ඇමතිවරයා පවසයි. අපගේ අනන්‍ය ආර්ථික කලාපය ආරක්ෂ කිරීම, ත්‍රස්ත ප්‍රහාර සහ මුහුදු කොල්ලකරුවන්ගෙන් නාවික ගමනාගමන කටයුතු ආරක්ෂා කිරීම, සෝදිසි මෙහෙයුම් සහ ආපදාවට ලක්වූවන් ගලවා ගැනීම, ඉහළ වටිනාකමකින් යුතු වෙනත් නෞකාවල උපරිම ආරක්ෂාව ලබාදීම මෙම නවීන යුද නෞකාව මිලදී ගැනීමට හේතු වී ඇති බව ද හෙතෙම පැවසීය.
ඇමතිවරයා මේ බව කියා සිටියේ ඊයේ (21) ශ්‍රීලනිප මූලස්ථානයේ පැවති මාධ්‍ය හමුවකදීය.
රුසියාවෙන් යුද නැවක් මිලදි ගැනීම සම්බන්ධයෙන් පසුගිය දිනවල මහත් ආන්දෝලනයක් ඇතිවුණු අතර, එම ගනුදෙනුව පිටුපස මෙරට විද්‍යුත් මාධ්‍ය ජාලයක ප්‍රධානියෙක් සහ රජයේ ඉහළම තැනක ඥාති පුත්‍රයකුගේ සබදතාවක් ගැන කියවිණි. එමෙන්ම හිටපු නාවික හමුදාපතිවරයාට සේවා දිගුවක් ලබා නොදී විශ්‍රාම ගැන්වූයේ ද මෙම නෞකා ගනුදෙණුවට ඔහු විරෝධය පලකිරීම නිසා යැයිද වාර්තා පලවිය.