කොළඹ නගරයේ එකතුවන කැලිකසළ පිලියන්දල, කරදියාන කසළ අංගණයට තාවකාලිකව බැහැර කිරීමට කැස්බෑව මහේස්ත්‍රාත් අධිකරණයෙන් ඊයේ (18දා) අවසර ලබාදී තිබේ.
මේවන විට පසුගිය දින කිහිපය පුරා කොළඹ නගර සීමාව තුළ එක්රැස් කරගත් කැලිකසළ එම ස්ථානයට බැහැර කිරීමේ කටයුතු ආරම්භ කර ඇති බව කොළඹ මහ නගර සභාවේ නාගරික කොමසාරිස් වී.කේ.ඒ අනුර මාධ්‍ය වෙත සඳහන් කර තිබේ.
කැස්බෑව අධිකරණයෙන් ඝණ අපද්‍රව්‍ය කළමණාකරන අධිකාරිය වෙත නියෝග කර ඇත්තේ ලබන 28 වන දින දක්වා දිනකට කසල මෙට්‍රික් ටොන් 350 බැගින් බාරගන්නා ලෙසයි.
මීට අමතරව කොළඹ අවට තෝරාගත් තවත් ස්ථාන කිහිපයකට ද කසළ බැහැර කිරීමේ කටයුතු මේවන විට සිදුකරන බවත්, එම ස්ථාන පිළිබඳ මාධ්‍යයට හෙළිදරව් කළ නොහැකි බවත් නාගරික කොමසාරිස්වරයා වැඩිදුරටත් සදහන් කර ඇත.