මෙතෙක් බිහිවූ කාර්යක්ෂමම සෞඛ්‍ය ඇමතිවරයා දොස්තර රාජිත සේනාරත්න බව, ශ්‍රී ලංකාවේ සංචාරයක නිරතව සිටින ලෝක සෞඛ්‍ය සංවිධානයේ දකුණු හා නැගෙනහිර ආසියානු කළාපීය අධ්‍යක්ෂිකා වෛද්‍ය පූනම් චෙට්‍රපාල් සිං මහත්මිය පවසයි.
ඇමති රාජිත සේනාරත්න සමග, ලෝක සෞඛ්‍ය සංවිධානයේ ශ්‍රී ලංකාවේ ප්‍රධාන කාර්යාලය විවෘත කිරීමේ අවස්ථාවට සහභාගී වෙමින් ඇය මේ බව ප්‍රකාශ කළාය.
“පසුගිය වසර 02 තුළ සෞඛ්‍ය අමාත්‍යවරයාගේ නායකත්වයෙන් සෞඛ්‍ය ක්ෂේත්‍රයේ වර්ධනයක් දක්නට ලැඛෙනවා. ඊට ප්‍රධානම හේතුව සෞඛ්‍ය අමාත්‍යවරයාගේ කැපවීමයි. දුම්කොළ බදු සියයට 90 දක්වා වැඩි කිරීම, ප්ලේන් සිගරට් පැකට්ටුවක් හදුන්වාදීමට ක්‍රියා කිරීම, ඉතා වැදගත් වෙනවා. අසියානු රටවලින් ප්ලේන් සිගරට් පැකට්ටුවක් හදුන්වා දීමට නියමිත එකම රට ශ්‍රී ලංකාවයි. ශ්‍රී ලංකාවෙි සෞඛ්‍ය පිළිබද විශාල බලාපොරොත්තුවක් තිඛෙනවා. රෝග නිවාරණය අතින් ශ්‍රී ලංකාව ඉදිරියෙන්ම සිටින අතර, එය කළාපයේ අනෙකුත් රටවලට ආදර්ශයක්. ශ්‍රී ලංකාව මධ්‍ය ආදායම් රටක් ලෙස නම් කර ඇතත්, දුප්පත්කම තුරන් කිරීමට වත්මන් රජය වැඩසටහන් රැසක් ක්‍රියාත්මක කරනවා. විශේෂයෙන්ම බෝනොවන රෝග පාලනය කිරීමට ගෙන ඇති ක්‍රීයාමාර්ග ඉතා වැදගත්. රෝග පාලනය කිරීම විශාල අභියෝගයක්.” යැයිද ඇය එහිදී පැවසීය.