අම්පාර දිස්ත්‍රික්කයේ පානම පොලිස් වසමට අයත් හැලව ප්‍රදේශයේ කුඹුරක රාත්‍රියේ පැල් රකිමින් සිටි ගොවියෙකු, කොටියෙකු විසින් සපාකෑම හේතුවෙන් මියගොස් ඇති බව පානම පොලීසිය කියයි.
සිද්ධියෙන් මියගොස් ඇත්තේ හීන්අප්පු අබේසිරි නැමති 56 හැවිරිදි ගොවියෙකි.
සිද්ධිය වන අවස්ථාවේ ඔහු සමඟ තවත් අයෙකු පැලේ සිට ඇත. කොටියා විසින් එම ගොවියා සපා කා සිරුර ඩැහැගෙන යාමට තැත් කරන විට දිවිගලවා ගත් පුද්ගලයා කෑගසා කොටියා පලවාහැර සිරුර රැගෙන යාම වළක්වාගෙන ඇති බව අනාවරණය වී ඇත.
සිද්ධිය සම්බන්ධව පානම පොලීසිය විසින් පොතුවිල අධිකරණයට කරුණු වාර්තා කර ඇති අතර ස්ථානීය පරීක්ෂණයක් සිදුකර ඇත.
මෘත ශරීරය මේ වනවිට පොතුවිල රෝහ‍ලේ මෘත ශරීරාගාරයේ තැන්පත් කර ඇත.