ඉකුත් 26 වැනි දා දිවුලපිටිය ප්‍රාදේශීය ලේකම්වරියකට නියෝජ්‍ය අමාත්‍ය රන්ජන් රාමනායක මහතා විසින් ප්‍රසිද්ධියේ බැන වදිමින් අපහාස කිරිම ඉල්ලා අස්කර නොගන්නේ නම් ජනවාරි 30 වැනි දා රාජකාරියෙන් බැහැර වී විරෝධය පළ කරන බව ගම්පහ දිස්ත්‍රික් පරිපාලන සේවා සංගමය පවසයි.
මේ සම්බන්ධයෙන් ගම්පහ දිස්ත්‍රික් ශ්‍රී ලංකා පරිපාලන සේවා සංගමය එහි උප සභාපති හා ලේකම් වරයාගේ අත්සනින් යුක්තව ජනපති ,අගමැති, කතානායක, රාජ්‍ය පරිපාලන හා කළමනාකරණ අමාත්‍ය හා ස්වදේශ ඇමැති වෙත අද (27) දහවල් ලිපි ඉදිරිපත් කොට ඇත.
මඩම්පැල්ල ග්‍රාම නිලධාරී වසමෙහි බොරළු පස් කැපීම සම්බන්ධයෙන් මහජන උද්ඝෝෂණයක් පැවති අවස්ථාවේ එහි පැමිණි සමාජ සවිබලගැන්වීම් හා සුභ සාධන නියෝජ්‍ය අමාත්‍ය රන්ජන් රාමනායක මහතා, සිය දුරකථනයෙන් දිවුලපිටිය ප්‍රාදේශීය ලේකම්වරියට බැණ වැදී තිබිණි.
