නව පොලිස්පතිවරයා තෝරාගත් ආකාරය සාධාරණ නොවන බවට පිවිතුරු හෙළ උරුමයේ නායක පාර්ලිමේන්තු මන්ත්‍රී උදය ගම්මන්පිල මහතා කරන ප්‍රකාශය පදනම් විරහිත බවත්, එය දේශපාල වෛරයෙන් සිදුකරන ලද්දක් බවත් ජාතික හෙළ උරුමයේ මාධ්‍ය ප්‍රකාශක බස්නාහිර පළාත් සභා මන්ත්‍රී නිශාන්ත ශ්‍රී වර්ණසිංහ මහතා පවසයි.
“ව්‍යවස්ථාදායක සභාවේ ජනාධිපති නියෝජිත වන පාඨලී චම්පික ඇමතිවරයා පොලිස් විමර්ශන 4 ක සැකකරුවෙක්. ඒ නිසා ඔහු මෙහි වාඩි වෙලා අනාගත පොලිස්පතිවරයා තේරීම හොරාගෙ අම්මගෙන් පේන ඇසීමක් නෙමෙයි හොරාගෙන් පේන ඇසීමක් වගේ වැඩක්.” යැයි ඊයේ 19 පැවති මාධ්‍ය හමුවකදී උදය ගම්මන්පිල මහතා ප්‍රකාශ කර තිබිනි.
ඒ සම්බන්ධයෙන් අදහස් දක්වමින් නිෂාන්ත ශ්‍රී වර්ණසිංහ මහතා මෙසේ පැවසීය.
“එතුමා හැලියෙ කිඹුල්ලු දකින කෙනෙක්. එතුමගෙ මෝඩ චූන්වලට අපි පිළිතුරු දියයුතු නැහැ. ඒ සභාවෙ ඉන්නෙ චම්පික ඇමතිතුමා විතරක් නෙමෙයිනෙ. චම්පික ඇමතිතුමාගෙ තනි මතයට අනෙක් සියලු දෙනාම එකඟ කරවගෙන පූජිත් ජයසුන්දර නම නිර්දේශ කළා කියන්න බැහැනෙ.”
රථ වාහන නඩුවක් පවතින අයෙකු මෙවැනි කටයුත්තක් සඳහා නුසුදුසු බවට උදය ගම්මන්පිල මහතා පළ කරන අදහස් විහිලු සහගත බව ද නිෂාන්ත ශ්‍රී වර්ණසිංහ මහතා වැඩිදුරටත් පවසයි.