ඩුබායි සිට මෙරටට ආනයනය කළ බහාලුමක සඟවා තිබූ ෂීෂා යන්ත්‍ර සඳහා භාවිතා කරන නිකටින් අඩංගු මත්ද්‍රව්‍ය තොගයක් සොයාගැනීමට රේගු වරාය පාලන ඒකකයට හැකිව තිබේ.
කිලෝග්‍රෑම් 8,000ක ශුද්ධ බරින් යුත් එම මත්ද්‍රව්‍ය තොගයේ වටිනාකම රුපියල් මිලියන 164ක් බවරේගු නිලධාරීන් සඳහන් කරයි.
ඔරුගොඩවත්ත, ග්‍රේ ලයින් 01 බහාලුම් පර්යන්තයේදී බහාලුම පරීක්ෂා කිරීමේ කටයුතු අද (18) පෙරවරුවේ සිදුකෙරුණි.
මේ පිළිබඳ වැඩිදුරටත් අදහස් දැක්වු ජ්‍යෙෂ්ඨ රේගු අධ්‍යක්ෂ (සමාජ ආරක්ෂණ අංශය), යූ.කේ.අශෝක රංජිත් මහතා,
“ඩුබායි සිට ලංකාවට පැමිණිලා තියෙන්නේ ව්‍යාජ ලෙස ලංකාවේ ව්‍යාපාර ආයතනයක නමක් භාවිත කරලා. මේකේ නිකටින් 0.5ක ප්‍රමාණයක් අඩංගු වෙනවා. ඒ අනුව මේක ආනයනය කිරීම තහනම් සහ සීමා සහිත වෙනවා. අත්හැර දැමූ බහාලුම්, නිෂ්කාෂණය කිරීම ප්‍රමාද කරන බහාලුම් පිළිබඳ අපි අවධානයෙන් ඉන්නවා. කොහොමද මේක ගෙනාවේ සහ කවුද මේක පිටුපස ඉන්නේ කියන කාරණය ගැන.”