තුර්කියේ සිදු වූ භූ කම්පනයෙන් ආපදාවට ලක්වූ ප්‍රදේශයේ සිටි ශ්‍රී ලාංකිකයින් 14 දෙනාගෙන් එක් අයෙකු සම්බන්ධයෙන් තොරතුරක් තවම ත් වාර්තා වී නැතැයි තුර්කියේ ශ්‍රී ලංකා තානාපතිනිය දැනුම් දී ඇති බව කැබිනට් ප්‍රකාශක ආචාර්ය බන්දුල ගුණවර්ධන පවසයි.
අද (7)දින පැවති කැබිනට් තීරණ දැනුම් දීමේ මාධ්‍ය හමුවේදී තුර්කියේ සිදු වූ මෙම ස්වභාවික ව්‍යසනයට සිය කනගාටුව ප්‍රකාශ කරමින් කැබිනට් ප්‍රකාශකවරයා මේ බව සඳහන් කළේ ය.
ශ්‍රී ලාංකිකයින් 14 දෙනොගෙන් 13 දෙනෙකු නිරුපද්‍රිතව සිටින බව තනාපතිනිය ප්‍රකාශ කර ඇති බව ද ඔහු මෙහිදී ප්‍රකාශ කළේ ය.
“මේ ඇති වෙච්ච ස්වභාවික ව්‍යසනය නිසා විපතට පත් සියලු දෙනා අතර ශ්‍රී ලාංකිකයින් විශාල පිරිසක් සිටින බව වාර්තා වුණා. නමුත් ශ්‍රී ලංකා තානාපතිතුමිය දැනුම් දීලා තිබෙනවා ශ්‍රී ලාංකිකයින් 14 දෙනෙක්ට පමණයි මේ සිද්ධිය පිළිබඳව යම්කිසි අදාළත්වයක් තිබෙන්නේ. ඉන් 13 දෙනෙකු නිරුපද්‍රිතව සිටින බව ත් එක් අයෙක් පිළිබඳ තොරතුරු තව ම සොයා ගෙන නැති බව ත් තමයි දැනුම් දීලා තිබෙන්නේ. ඒ නිසා ශ්‍රී ලාංකිකයන් බොහෝ දෙනෙක් මේ උවදුරේදී නිරුපද්‍රිතව සිටිනවා.”