ඇවන්ගාඩ් නඩුව ඊයේ (30) කොළඹ මහේස්ත්‍රාත් අධිකරණයේදී විභාගයට ගත් අවස්ථාවේ එහි විත්තිකරුවන් වූ හිටපු ආරක්ෂක ලේකම් ගෝඨාභය රාජපක්ෂ මහතා, හිටපු නාවික හමුදාධිපතිවරුන් තිදෙනා ඇතුළු පිරිස වෙනුවෙන් නීතීඥයන් සියයකට වැඩි පිරිසක් පෙනී සිටියහ.
ගෝඨාභය රාජපක්ෂ මහතා වෙනුවෙන් ජනාධිපති නීතීඥවරුන් ඇතුළු නීතිඥයන් 60 දෙනෙකුද ඉතිරි පිරිස සෙසු සැකකරුවන් වෙනුවෙන්ද පෙනී සිටියහ. එක් පුද්ගලයෙකු වෙනුවෙන් ජ්‍යෙෂ්ඨතම නීතිඥයන් වැඩිම පිරිසක් එකවර සහභාගී වූ මුල් අවස්ථාව මෙය බව නීතී ක්ෂේත්‍රයේ ආරංචි මාර්ග පවසයි.
ගෝඨාභය රාජපක්ෂ මහතාගේ පාර්ශවයේ නීතීඥයන් මූලික විරෝධතාවයක් ගොනු කරමින් පෙන්වා දුන්නේ මෙම නඩුව පවරා ඇත්තේ නිසි නීතිමය ක‍්‍රියාමාර්ග අනුමනය කිරීමෙන් තොරව බවයි. මේ නිසා තව දුරටත් නඩුව පවත්වාගෙන යන්නේද නැද්ද යන්න තීරණය කිරීම එළැඹෙන දෙසැම්බර් මස 03 වැනි දිනට කල් දමනු ලැබීය.
