දකුණු අප්‍රිකානු පාර්ලිමේන්තු ගොඩනැගිල්ලට ගිනි තැබීම සම්බන්ධයෙන් එක් පුද්ගලයෙක්ව අත්අඩංගුවට ගත් බව එරට පොලීසිය පවසයි.
කේප් ටවුන් නගරයේ පිහිටි එම ගොඩනැගිල්ලේ තෙවැනි මහලේ ඇරඹුණු ගින්න වේගයෙන් අනෙක් ගොඩනැගිලි කරාද පැතිර යෑම හේතුවෙන් සිදුවී ඇති විනාශය විශාල බව වාර්තා විය.
ගින්න පාලනය කිරීම සඳහා දැඩි වෙහෙසක් දැරීමට ගිනි නිවන භටයින්ට සිදුවිය.
අත්අඩංගුවට ගත් සැකකරුව අධිකරණයට ඉදිරිපත් කිරීමට නියමිතය.
ජනාධිපති සිරිල් රාමපෝෂා පැවසුවේ සිදුවී ඇත්තේ “භයානක හා විනාශකාරී සිදුවීමක්” බවත් පාර්ලිමේන්තු කටයුතු නොකඩවා සිදුකරන බවත් ය.
එම විනාශ වූ ගොඩනැගිලි නැරඹීමට ගිය ජනාධිපතිවරයා පැවසුවේ “අපේ ප්‍රජාතන්ත්‍රවාදයේ නිවහන” විනාශ වූ බවය.