පාඩු ලබමින් පවත්වාගෙන යන රාජ්‍ය ආයතන ප්‍රතිව්‍යුහගතකරණය කිරීමේ වැඩපිළිවෙළ යටතේ දැනට ලාභ ලබන ආයතන 2ක්ද ප්‍රතිව්‍යුහගත කිරීමට සූදානම්වන බව වාර්තා වේ.
මෙසේ ප්‍රතිව්‍යුහගත කිරීමට සැරසෙන ආයතන දෙක වන්නේ මිනරල් සෑන්ඩ්ස් හා පරන්තන් කෙමිකල්ස් යන ආයතන දෙකයි.
මේ සම්බන්ධ තීන්දුව මේවන විට අග්‍රාමාත්‍ය ලේකම් සමන් ඒකනායක මහතා විසින් කර්මාන්ත හා වානිජ අමාත්‍යංශයේ ලේකම්වරයාට ලිඛිතව දන්වා ඇතැයි පැවසේ. පසුගිය 10 වැනිදා රැස්වූ ආර්ථික කළමනාකරණය පිළිබඳ කැබිනට් කමිටුව විසින් මේ තීරණය ගෙන තිබේ.
පරන්තන් කෙමිකල්ස් ආයතනය ජාතික ජල සම්පාදන මණ්ඩලයට ජලය පිරිසිදු කිරීමට ක්ලෝරීන් සපයමින් ලාභ ලබන බව පැවසේ. ලංකා මිනරල් සෑන්ඩ් ආයතනය ද රුපියල් මිලියන 500කට වඩා ගිණුම් ශේෂයක් පවත්වාගෙන යනු ලබන ආයතනයක් බව වාර්තා වේ.
මේ අතර කර්මාන්ත හා වානිජ අමාත්‍ය රිෂාඩ් බදුර්දීන් මහතාගේ සමීප හිතවතෙකු සහ ව්‍යාපාරික හවුල්කරුවකුගේ සමාගමක් වන “ඇල්කමි” වෙත මෙම රාජ්‍ය සමාගම් දෙක විකුණා දැමීමට සියලු කටයුතු සුදානම් ඇත. සමාගම් දෙකෙහි මූල්‍යමය වටිනාකම පවා නිවැරදි ලෙස තක්සේරු කර නොමැති අතර, පවතින වටිනාකමටත් අඩුවෙන් කුණු කොල්ලයට මෙම සමාගම් දෙක විකුණා දැමීම සදහා කටයුතු සිදුවෙමින් පවතින බවද අභ්‍යන්තර ආරංචිමාර්ග වැඩි දුරටත් අනාවරනය කරයි.