ලබන වසරේ සිට පොදු ස්ථානවලට ඇතුළුවීමේදී එන්නත් කාඩ්පත අනිවාර්ය කරන බව, සෞඛ්‍ය අමාත්‍ය කෙහෙළිය රඹුක්වැල්ල මහතා පවසයි.
අමාත්‍යවරයා සඳහන් කළේ, මේ වන විට ඊට අදාළ නීති උපදෙස් ද ලබාගෙන ඇති බවයි.
ඒ අනුව එන්නත් දෙකම ලබාගත් පුද්ගලයින් වෙනුවෙන් විශේෂ කේත අංකයක් ද සහිතව යෙදවුමක් නිර්මාණය කරනු ඇති.
මේ පිළිබඳ වැඩිදුරටත් අදහස් දක්වමින් අමාත්‍යවරයා සඳහන් කළේ, සිනමා ශාලාවක් වැනි ස්ථානයක් තුළ සිටින අයෙකු එන්නත් කාඩ්පත නොමැතිව ඇතුළු වී ඇත්නම්, එහි වගකීම කළමනාකාරීත්වය භාරගත යුතු බවයි.
එන්නත් නොගෙන සිටීමට ඕනෑම අයෙකුට අයිතියක් ඇති නමුත් අන් අයගේ ජීවිත අවදානමට ලක් කිරීමට කිසිවෙකුටත් අයිතියක් නොමැති බව සෞඛ්‍ය අමාත්‍යවරයා සඳහන් කරයි.