ඉන්දියාවේ කුෂිනගර් ජාත්‍යන්තර ගුවන් තොටුපොළ විවෘත කිරීමේ අවස්ථාවට මෙරටින් වැඩම කරන මහා සංඝරත්නය ඇතුළු ධූත පිරිස අද(20) අලුයම දිවයිනෙන් පිටත්ව ගියේ ය.
ඒ යූ.එල් 1147 දරණ ශ්‍රී ලංකන් ගුවන් සේවයට අයත් යානයකින් ය.
ඉන්දීය ආග්‍රාමාත්‍ය නරේන්ද්‍ර මෝදි මහතා විසින් කුෂිනගර් ජාත්‍යන්තර ගුවන් තොටුපොළ අද විවෘත කිරීමට නියමිත ය.
ඒ අනුව ගුවන් තොටුපොළ විවෘත කිරීමේ අවස්ථාව සංකේතවත් කරමින් ශ්‍රී ලංකන් ගුවන් යානය පළමුව එහි ගොඩ බැස්වීමට සැළසුම් කර තිබේ.
මෙම ගුවන් ගමනට 111 දෙනෙකුගෙන් යුත් ධූත පිරිසක් සහභාගී විය.
ඒ අතරට සියම් මහා නිකායේ අස්ගිරි පාර්ශවයේ අනුනායක අතිපූජ්‍ය වෙඩරුවේ උපාලි අනුනාහිමියන් ඇතුළු ත්‍රෛනිකායික මහා සංඝරත්නයේ 95 නමක් ද ඇතුළත් ය.
මේ අතර වස්කඩුව රාජගුරු ශ්‍රී සුභූති විහාරස්ථානයේ තැන්පත් කර තිබූ කපිල වස්තුපුර ශ්‍රී සර්වඥ ධාතූන් වහන්සේ කුෂිනගර් ජාත්‍යන්තර ගුවන්තොටුපොළේ ආගමික වතාවත් සඳහා ඉන්දියාවට වැඩම කරවීම ද මෙහිදී සිදු කෙරිණ.
අමාත්‍ය නාමල් රාජපක්ෂ රාජ්‍ය අමාත්‍යවරුන් වන ඩී.වී චානක, සිසිර ජයකොඩි යන මහත්වරුන් ද මෙම සංචාරය සඳහා එක්විය.