වසර පහක කාලයකට රුපියල් කෝටි අනූ හයක කුලී පදනම මත කෘෂිකර්ම අමාත්‍යාංශය සදහා ගොඩනැගිල්ලක් ලබා ගැනීමට කැබිනට් අනුමැතිය හිමිවූ බවත් එයට කිසිවෙකුත් විරෝධය පලකර නැති බවත් කැබිනට් ප්‍රකාශක අමාත්‍ය රාජිත සේනාරත්න මහතා ඊයේ 27 දා ප්‍රවෘත්ති දෙපාර්තමේන්තුවේදී පැවති කැබිනට් තීරණ දැනුම් දීමේ මාධ්‍ය හමුවේදී පැවසීය.
මෙම ගොඩනැඟිල්ල කුලියට ලබා ගැනීම අත්හිටුවා ඇති බවට තමා ඉකුත් සතියේ කැබිනට් තීරණ දැනුම්දීමේ මාධ්‍ය හමුවේදී ප්‍රකාශ කළ බවට මාධ්‍යවල පළ වූ වාර්තා සම්පූර්ණයෙන් ම අසත්‍ය යෑයි ද, තමා එවැනි ප්රකාශයක් නොකළ බව ද එම ගොඩනැඟිල්ල කුලියට ලබා ගැනීම සිදුවන බව ද ඇමැතිවරයා කියා සිටියේය.
මෙහිදී මාධ්‍යවේදියකු නැගූ ප්‍රශ්නයකට පිළිතුරු දුන් ඇමැතිවරයා රජයේ තක්‌සේරුවට අනුව අඩු මිලට ගොඩනැඟිලි ලබා ගත නොහැකි බවත් පෞද්ගලික අංශයේ තක්‌සේරුව රජයේ තක්‌සේරුවට වඩා වැඩි බවත් වෙනත් ගොඩනැඟිලිවල වටිනාකම් පිළිබඳ සොයා බලා මෙය ලබා ගැනීමට කටයුතු කර ඇති බවත් කීය.
දැනට කෘෂිකර්ම අමාත්‍යාංශය පවත්වාගෙනයන රජයේ ගොඩනැඟිල්ල පාර්ලිමේන්තු කාරක සභාව පවත්වාගෙන යැමට පාර්ලිමේන්තුවට ලබා දෙන බවත් ඒ අනුව කඩිනමින් කෘෂිකර්ම අමාත්‍යාංශය නව ගොඩනැඟිල්ලට ගෙන යන බවත් ඇමැතිවරයා කීය.
නව ගොඩනැඟිල්ල කුලියට ලබා ගැනීම පිළිබඳව රාජ්‍ය ගිණුම් කාරක සභාව කෘෂිකර්ම අමාත්‍යාංශයේ නිලධාරීන් කැඳවා පරීක්‍ෂණයක්‌ කළ නමුත් ගොඩනැඟිල්ල ලබා ගැනීම එම කාරක සභාව ද අත්හිටුවා නොමැති බවත් සේනාරත්න මහතා කීය.
රුපියල් එක්‌කෝටි පනස්‌ලක්‍ෂ හැත්තෑපන්දහසක මාසික කුලියක්‌ යටතේ වසර පහකට මෙම ගොඩනැඟිල්ල ලබා ගැනීමට නියමිතය. වසර දෙකකට වරක්‌ කුලී මුදල වැඩි කිරීම ඇතුළු කොන්දේසි කීපයක්‌ ද ඊට ඇතුළත්ව ඇත.