ඩොලර් හිඟය හේතුවෙන් නිදහස් කරගැනීමට නොහැකිව වරාය තුළ සිරවී තිබෙන ආනයනික අත්‍යවශ්‍ය ආහාර කන්ටේනර් නිදහස් කර ගැනීම සඳහා ඩොලර් මිලියන 25 ක් ලබාදීමට මහ බැංකු අධිපතිවරයා අද (16)දින එකඟ වී තිබේ.
වෙළඳ අමාත්‍ය ආචාර්ය බන්දුල ගුණවර්ධන මහතාගේ ඉල්ලීමකට අනුව මහ බැංකු අධිපති අජිත් නිවාඩ් කබ්රාල් මහතා ඩොලර් මිලියන 25 නිදහස් කිරීමේ කටයුතු හෙට (17) සිට ආරම්භ කිරීමට එකඟ වී ඇත.
වෙළඳ අමාත්‍ය ආචාර්ය බන්දුල ගුණවර්ධන මහතා සහ අත්‍යවශ්‍ය ආහාර ආනයනකරුවන් අතර ඊයේ වෙළද අමාත්‍යංශයේ දී පැවැති සාකච්ඡාව අතරතුරදී අමාත්‍යවරයා මහ බැංකු අධිපතිවරයා සම්බන්ධ කරගනිමින් ඩොලර් මිලියන 25 ලබාගැනීමට කටයුතු කළේය.
එම සාකච්ඡාවට සහභාගි වූ ආනයනකරුවකු පැවසුවේ අමාත්‍යවරයා මැදිහත්වී ඩොලර් නිදහස් කිරීමට මහ බැංකු අධිපතිවරයාගේ ඉල්ලීමක් කළ බවත් එම ඩොලර් ප්‍රමාණය ඉක්මනින් ලැබුනහොත් කන්ටේනර් නිදහස් කර ගැනීමේ අවස්ථාව ඇති බවයි.
අත්‍යවශ්‍ය ආහාර ද්‍රව්‍ය වන සහල් පරිප්පු සීනි අර්තාපල් සහ ලොකු ලූනු ඇතුළු අත්‍යවශ්‍ය ආහාර ද්‍රව්‍ය කන්ටේනර් දහසකට අධික ප්‍රමාණයක් කොළඹ වරාය තුළ සිර වී ඇති බවත් හැකි ඉක්මනින් ඩොලර් නිදහස් කළහොත් කන්ටේනර් නිදහස් කර ගැනීමේ හැකියාව ලැබෙන බවත් එම ප්‍රධාන ආනයන කරුවන් දුරටත් කීය.