අර්තාපල් ආදී බෝගවලට වැලඳෙන දිලීර වසංගත සඳහා කාබනික විසඳුමක් නොමැති බැවින් ජනාධිපතිවරයාගෙන් ඉල්ලීමක් කර පළිබෝධ නාශක යම් ප්‍රමාණයක් ගෙන්වා වරායේ ගුදම්ලා ඇතැයි කෘෂිකර්ම ඇමැති මහින්දානන්ද අලුත්ගමගේ පවසයි.
කාබනික ආහාර හා කෘෂිකර්ම වාර්තාකරණය පිළිබඳව මාධ්‍ය දැනුවත් කිරීම සඳහා හෙක්ටර් කොබ්බෑකඩුව ගොවි කටයුතු පර්‌යේෂණ ආයතනයේදී ඊයේ (14)දින පැවැති වැඩමුළුවකදී ඇමැතිවරයා මේ බව කීවේය. මෙම අවස්ථාවට කෘෂිකර්ම රාජ්‍ය ඇමැති ශෂීන්ද්‍ර රාජපක්ෂ ද සහභාගි විය.
නුවරඑළිය වැනි ප්‍රදේශයක අර්තාපල් වගාවට යම් ගැටලු තත්ත්වයක් ඇතිවුවහොත් කෘෂිකර්ම දෙපාර්තමේන්තුවේ නිර්දේශය මත එම පළිබෝධ නාශක වගාවට යොදා එම කලාපය කාබනික රහිත කලාපයක් ලෙස නම් කරන බවද ඇමැතිවරයා පැවසුවේය.
කාබනික දිලීර නාශක, වල් නාශක, කෘමිනාශක විශාල ප්‍රමාණයක් රටේ තිබෙන බවත්, ඒ සියල්ල එළියට ගෙන ලියාපදිංචි කිරීමට කටයුතු යොදා ඇති බවත් ඇමැතිවරයා කියයි.
මෙම පළිබෝධ නාශක අධික භාවිතය නිසා වකුගඩු රෝගීන් සංඛ්‍යාව එක්ලක්ෂ පනස්දහසක් දක්වා වැඩිවී ඇතැයි ද ඇමැතිවරයා වැඩිදුරටත් පැවැසීය.