කොළඹ දිසා අධිකරණය විසින් රනිල් වික්‍රමසිංහ මහතා ඇතුළු පිරිසක් වෙත වාරණ නියෝගයක් නිකුත් කර තිබේ.
ඒ දිවයිනේ පළාත් පාලන ආයතන කිහිපයක් නියෝජනය කළ එක්සත් ජාතික පක්ෂයේ පළාත් පාලන මන්ත්‍රීවරු 21 දෙනෙකු නෙරපාහැරීම හේතුවෙන් මතුවන පුරප්පාඩු සඳහා වෙනත් අය නම් කිරීම වළක්වාලමිනි.
කොළඹ දිසා විනිසුරු අරුණ අලුත්ගේ මහතා විසින් අදාළ වාරණ නියෝගය නිකුත් කළේය.
ඒ අදාළ මන්ත්‍රීවරුන් විසින් ඉදිරිපත් කළ පැමිණිලි සලකා බැලීමෙන් පසුව ලබන 29 වනදා තෙක් බලපැවැත්වෙන පරිදිය.
ඒ අනුව පැමිණිලිවල වගඋත්තරකරුවන් ලෙස නම් කර තිබූ එක්සත් ජාතික පක්ෂයේ මහලේකම් පාලිත රංගේබණ්ඩාර, එම පක්ෂයේ නායක රනිල් වික්‍රමසිංහ, එම පක්ෂයේ විනය කමිටුවේ ලේකම් සමින්ද ජයසේකර යන අයට එරෙහිව මෙම වාරණ නියෝගය නිකුත් කර ඇත.