මේ වන විට රටේ අවශ්‍යතාවට සරිලන තරම් විදුලිබල ධාරිතාවක්‌ මණ්‌ඩලය සතුව නොමැති නිසා දැනුම්දීමකින් තොරව වරින්වර විදුලිය කපා හරින බව විදුලිබල හා පුනර්ජනනීය බලශක්‌ති නියෝජ්‍ය ඇමැති අජිත් පී. පෙරේරා පවසයි.
රට පුරාම විදුලිය බිඳ වැටුණු පසු නොරොච්චෝල බලාගාරයෙන් මෙගොවොට්‌ නවසියයක්‌ම අහිමි වීමෙන් මේ වන විට මෙගොවොට්‌ 350-400 ක පමණ හිඟයක පවතින බව නියෝජ්‍ය ඇමැතිවරයා කියා සිටියේය.
ලංකා විදුලිබල මණ්‌ඩලය හා පුද්ගලික බලාගාරවලින් ලබා ගන්නා විදුලියද ඇතුළත්ව මෙගොවොට්‌ 3900 ක පමණ විදුලිබල ධාරිතාවක්‌ මණ්‌ඩලය සතුව තිබුණද මේ දිනවල පවතින නියඟය හා නොරොච්චෝල ගල්අඟුරු බලාගාරය අක්‍රියවීම නිසා මෙගොවොට්‌ 350-400 ක හිඟය මතුවී ඇතැයි ඇමැතිවරයා සඳහන් කළේය.
ඇතිවූ ක්‍ෂණික දුෂ්කර තත්ත්වය සැලකිල්ලට ගෙන විදුලිය අරපරිස්‌සමින් භාවිත කරන ලෙස රජය ජනතාවගෙන් ඉල්ලා සිටින බවද ඇමැතිවරයා පැවැසීය.
විදුලිය කපා හරින කාලය නිල වශයෙන් නිවේදනය නොකරන්නේ මන්දැයි කළ විමසීමකට පිළිතුරු දුන් නියෝජ්‍ය ඇමැතිවරයා කියා සිටියේ යම්කිසි කාලයක් ප්‍රකාශයට පත් කළහොත් විදුලිය අරපරිස්‌සම් කිරීමේ උත්සාහය අසාර්ථක වීමට ඉඩ තිබෙන බවයි. ඒ අනුව දැනට නොදන්වා ප්‍රදේශයෙන් ප්‍රදේශයට විදුලිය කපා හැර පවතින තත්ත්වයට මුහුණදීමට සිදුව ඇති බවද හෙතෙම පැවැසීය.
ජනතාව දැඩි අපහසුතාවට පත් නොකර ඉතා කෙටි කාලයකට මෙලෙස විදුලිය කපා හරින ලෙස උපදෙස්‌ දී ඇතැයිද හැකි ඉක්‌මනින්ම රටට අවශ්‍ය විදුලිය ජනනය කිරීමට විදුලිබල මණ්‌ඩලය සියලු උත්සාහ ගන්නා බවද ඇමැතිවරයා තවදුරටත් කියා සිටියේය.