ගාල්ල බන්ධනාගාරයට පැමිණි පාඨමාලා උපදේශකවරයෙකුගේ පාවහන් යුගලයේ සූක්ෂම ලෙස සඟවා ගෙන ආ දුම්කොළ පාර්සලයක් බන්ධනාගාර නිලධාරීන් විසින් සිය භාරයට ගෙන තිබේ.
බන්ධනාගාරගත රැඳවියන්ගේ පුනරුත්ථාපන වැඩසටහන් යටතේ ක්‍රියාත්මක වන ලැදියා පාඨමාලා සඳහා මෙම උපදේශකවරයා පැමිණ ඇත.
සැකකරු අද (13) උදෑසන 9ට පමණ ගාල්ල බන්ධනාගාරයේ ප්‍රධාන දොරටුවෙන් ඇතුල්වීමට පැමිණ ඇති අතර එහිදි බන්ධනාගාර නිලධාරීන් විසින් ඔහුව සෝදිසියකට ලක්කර තිබේ.
උපදේශකවරයා පැලඳ සිටි පාවහන් යුගලය තුළ මෙම දුම්කොළ පාර්සලය සඟවා තිබූ බව බන්ධනාගාර නිලධාරීන් පවසයි.
අත්අඩංගුවට ගත් දුම්කොළ සහ අදාළ සැකකාර පාඨමාලා උපදේශකවරයා ගාල්ල පොලිස් ස්ථානය වෙත භාර දී තිබේ.
සිදුවීම සම්බන්ධයෙන් ඉදිරි මූලික විමර්ශන ආරම්භ කර ඇති බව බන්ධනාගාර දෙපාර්තමේන්තුව පවසයි.