මාර්ග වැරදි සඳහා දඩ මුදල් වැඩි කිරීමට විරෝධය පල කරමින් පෞද්ගලික බස් සංගම් කිහිපයක් විසින් අද (02) අළුයම සිට ආරම්භ කරන ලද බස් වැඩ වර්ජනය හේතුවෙන් දිවයින පුරා මගී ප්‍රවාහනය අඩාල වී ඇති බව වාර්තා වෙයි.
අන්තර් පළාත් පෞද්ගලික බස් සංගමය කියා සිටියේ පිලිගත හැකි විසඳුමක් ලැඛෙන තෙක් මෙම වැඩවර්ජනය අත්නොහරින බවයි.
ලංගම බස් රථ හා ඇතැම් පුද්ගලික බස් රථ වර්ජනයට සහභාගී නොවී සුපුරුදු පරිදි ධාවනයේ යෙදෙයි.
මේ හේතුවෙන් අද පෙරවරුවේ රාජකාරී කටයුතු සදහා යාමට බලාපොරොත්තුවෙන් බොහෝ පිරිස් මග දෙපස විශාල වශයෙන් රැදී සිටිති.
මේ අතර ත්‍රීරෝද රථ සංගම් සමහරක් ද අද වැඩවර්ජනයක නිරත වේ. ජාතික ඒකාබද්ධ ත්‍රීරෝද රථ රියදුරන්ගේ සහ කර්මාන්තකරුවන්ගේ සමිතියේ ලේකම් රෝහණ පෙරේරා මහතා කියා සිටියේ පෙරවරුවේ උද්ඝෝෂණ රථ පෙලපාලියක් ද සංවිධාන කර ඇති බවයි.
කෙසේ වෙතත් ඇතැම් ත්‍රීරෝද රථ සංගම් මෙම වෘත්තීය සමිති ක්‍රියාමාර්ගයට එක්ව නොමැත.