අභියාචනාධිකරණය හමුවේ අද (13) දිනයේ පෙනී නොසිටීමේ චෝදනාව මත රාජ්‍ය අමාත්‍ය සනත් නිශාන්ත මහතා වහා අත්අඩංගුවට ගෙන අධිකරණය හමුවට ඉදිරිපත් කරන්නැයි අභියාචනාධිකරණය මීට ටික වේලාවකට පෙර නියෝග කර තිබේ.
පොදුජන පෙරමුණු පක්ෂ මූලස්ථානයේ පැවති මාධ්‍ය හමුවකදී සනත් නිශාන්ත මහතා අධිකරණයට හා මහේස්ත්‍රාත්වරුන්ට අපහාසවන අන්දමේ ප්‍රකාශයක් කළ බවට චෝදනා කරමින් අධිකරණ සේවා සංගමය හා නීතිඥවරුන් පිරිසක් අභියාචනාධිකරණය හමුවේ පෙත්සම් ගොනුකර තිබුණි.
පෙත්සම්වල සඳහන් පරිදි අධිකරණයට අපහාස කලැයි නැගෙන චෝදනාවට අදාළව දඬුවම් නියම නොකිරීමට අද දිනයේ අධිකරණය හමුවේ පෙනී සිට කරුණු දක්වන්නැයි රාජ්‍ය අමාත්‍ය සනත් නිශාන්ත මහතාට අභියාචනාධිකරණය නියෝග කර තිබුණි.
නිශ්ශංක බන්දුල කරුණාරත්න හා ආර්. ගුරුසිංහ යන අභියාචනාධිකරණ විනිසුරු මඩුල්ල හමුවේ අද පෙත්සම් යළි විමසා බැලුණු අතර එහිදී සනත් නිශාන්ත මහතා අධිකරණය හමුවේ පෙනී සිට නැත.
ඔහු අත්අඩංගුවට ගෙන වහා අධිකරණයට ඉදිරිපත් කරන්නැයි අභියාචනාධිකරණය පොලිස්පතිවරයාට ඒ අනුව නියෝග කර ඇත.