නව ලිබරල්වාදී මත තිබෙන කිසිම ආණ්ඩුවක් ජාතික ආරක්ෂාවට ප‍්‍රමුඛත්වයක් ලබා නොදෙන බවත්, විජාතික අදහස්වලට නැමෙන්නේ නැති නායකත්වයක් රටට අවශ්‍ය බවත් ගෝඨාභය රාජපක්ෂ මහතා සඳහන් කළේය.
අපි විනයගරුක නොවුණොත් විනයගරුක රටක් හදන්න බැරි බවත්, රට නියම ආකාරයට ගෙන යෑමට නම් සියලූ දෙනාම විනයගරුක විය යුතු බවත් ශී‍්‍ර ලංකා පොදුජන පෙරමුණේ ජනාධිපති ධුර අපේක්ෂක ගෝඨාභය රාජපක්ෂ මහතා ප‍්‍රකාශ කළේය.
මහින්ද රාජපක්ෂ රජය සාමකාමී රටක් බිහි කළ බවත්, වත්මන් රජය රට තුළ යළිත් සෝදිසි කිරීම් යුගයක් ඇති කළ බවත් ගෝඨාභය රාජපක්ෂ මහතා ඊයේ (14 දා) කුරුණෑගල දිස්ති‍්‍රක්කයේ පැවති ජනහමු අමතමින් පැවසීය.
ඉදිරියේදී බිහිකරන රජයක් තුළින් රටේ ජාතික ආරක්ෂාවට ප‍්‍රමුඛත්වයක් ලබාදෙන බවත්, යළිත් සුරක්ෂිත රටක් බිහිකරන බවට පොරොන්දු වන බවත් ඒ මහතා කීවේය.
ති‍්‍රවිධ හමුදාව සහ බුද්ධි අංශ ශක්තිමත් කරමින් යළිත් අන්තවාදී ත‍්‍රස්තවාදයක් රට තුළ ඇති නොවන ආකාරයට රටේ ජාතික ආරක්ෂාව තහවුරු කරන බවත් හෙතෙම වැඩිදුරටත් පැවසීය.