කෘෂි රසායන පොහොර ආනයනය කර බෙදාහරින සී.අයි.සී. සමාගම මෙරට පවතින ආනයනික රසායනික පොහොර සම්බන්ධයෙන් වන නීති රීති උල්ලංඝනය කරමින් තහනම් බැර ලෝහ සහිත පොහොර තොගයක් මෙරටට ආනයනය කර තිබේ.
මෙම පොහොර තොගයෙහි කැඞ්මියම් (cadmium ) බැර ලෝහ ඉතා අධික ලෙස අන්තර්ගත වී ඇති බව ශ‍්‍රී ලංකා ප‍්‍රමිති ආයතනය කළ පර්යේෂණවලින් හෙළිදරව් වී ඇත.
අන්තර්ජාතික ප‍්‍රමිතීන්ට අනුව අන්තර්ගත විය යුතු කැඞ්මියම් ප‍්‍රමාණය 5%කට වඩා අඩු වූවත් මෙම සමාගම ඉදිරිපත් කල වාර්තා වල සඳහන් වන්නේ එය 2%ක් බවය.
එහෙත් අදාළ පෞද්ගලික ආයතනය මඟින් ආනයනය කළ පොහොර තොගයේ 23.7%ක් බැර ලෝහ පවතින බවට හෙළිදරව් වීමත් සමඟ අදාළ පොහොර තොගය මුද්‍රා තැබීමට බලධාරීන් විසින් තීරණය කර ඇත.
වකුගඩු රෝගය වැළඳීම සඳහා බලපානු ලබන්නේ කැඞ්මියම් බැර ලෝහය ශරීරගත වීම බව ලෝක සෞඛ්‍ය සංවිධානය මඟින් අනාවරණය කොට ඇත.
එමෙන්ම එය මිනිස් සිරුරට ඇතුළු වන්නේ ප‍්‍රමිතියෙන් තොර රසායනික පොහොර භාවිතය නිසා බවට ද වාර්තා වී ඇත. එහෙයින් විටින් විට රසායනික පොහොර භාවිතය සම්බන්ධ අන්තර්ජාතික ප‍්‍රමිති සහතික නිකුත් කිරීමට පවා ලෝක සෞඛ්‍ය සංවිධානයට සිදු විය.
මේ වන විට කෘෂිකර්ම අමාත්‍යාංශය විසින් එම පොහොර ගබඩාවට මුද්‍රා තබා ඇත.