කැලණිය පොලිස් වසමේ තල්වත්ත, ගෝනවල ප්‍රදේශයේ දී තියුණු ආයුධයකින් පහර දීමෙන් පුද්ගලයෙක් ජීවිතක්ෂයට පත්ව තිබේ.
ඊයේ (15)දින රාත්‍රී 8.30ට පමණ මෙය සිදු ව ඇත.
ගෝනවල ප්‍රදේශයේ කුලී කාමරයක පදිංචි ව සිටි මිතුරන් දෙදෙනෙකු අතර ඇති වු බහින්බස් වීමක් දුරදිග යෑමෙන් මෙය සිදුව ඇත.
එහිදී එක් අයෙකු විසින් අනෙක් තැනැත්තාට තියුණු ආයුධයකින් පහර දී බරපතළ තුවාල සිදුකර ඇත.
තුවාලකරු කිරිබත්ගොඩ රෝහලට ඇතුළත් කිරීමෙන් අනතුරුව මියගොස් ඇති බවට කැලණිය පොලීසියට ලද තොරතුරක් මත විමර්ශන ආරම්භ කර තිබේ.
පිහිපහරින් මිය ගොස් ඇත්තේ වයස අවුරුදු 18ක් වු ගල්ලූල්ල වත්ත, මඩොල්සිම ප්‍රදේශයේ පදිංචිකරුවෙකි.
මොවුන් දෙදෙනා රැකියාවක් සොයා පැමිණ මෙලෙස කුලී පදනම මත නතර ව සිට ඇති බවට තොරතුරු අනාවරණය වී තිබේ.
සැකකරු මේ වන විට අත්අඩංගුවට ගෙන ඇති අතර, අද (16) දින මහර මහෙස්ත්‍රාත් අධිකරණය වෙත ඉදිරිපත් කිරීමට නියමිතය.
කැලණිය පොලීසිය වැඩිදුර විමර්ශන සිදුකරයි.