පොලිස් මත්ද්‍රව්‍යනාශක කාර්යංශයේ නිලධාරින්, මත්ද්‍රව්‍ය ජාවාරම්කරුවන් සමග සම්බන්ධතා පවත්වන බවට වන හඬ පට ඇතුළත් සී.ඩී. තැටියක් දේශපාලන පළිගැනීම් පිළිබඳ සෙවීමේ ජනාධිපති කොමිසම වෙත බාර දී ඇත.
පොලිස් මත්ද්‍රව්‍යනාශක කාර්යංශයේ අධ්‍යක්ෂවරයා විසින් අදාළ සී.ඩී පටය ඊයේ (06)දින ජනාධිපති කොමිසම වෙත බාර දී ඇති බව වාර්තා වේ.
එම කාර්යංශයේ හිටපු පොලිස් පරීක්ෂක නියෝමාල් රංගජීව මහතා ඉදිරිපත් කළ පැමිණිල්ලේ සාක්ෂි විමසීම් සිදුවූ අවස්ථාවකදී ඔහු අනාවරණය කර සිටියේ නිලධාරීන් සහ මත්ද්‍රව්‍ය ජාවාරම්කරුවන් අතර සම්බන්ධතා පවත්වන බවට සාක්ෂි පවතින බවයි.
ඒ අනුව පොලිස් මත්ද්‍රව්‍යනාශක කාර්යංශයේ අධ්‍යක්ෂවරයා කොමිසම වෙත කැඳවා අදාළ සාක්ෂි ලබාගන්නා ලෙස නියෝමාල් රංගජීව මහතා ඉල්ලීමක් කර තිබුණි.
ඊට අදාළව සිදුකළ දැනුම්දීමකට අනුව පොලිස් මත්ද්‍රව්‍යනාශක කාර්යංශයේ නිලධාරියෙකු සහ මත්ද්‍රව්‍ය ජාවාරම්කරුවෙකු අතර සිදුවූ සංවාදයක හඬ පට ඇතුළත් සී.ඩී පටයක් මෙලෙස එහි අධ්‍යක්ෂවරයා විසින් ජනාධිපති කොමිසම වෙත බාර දී තිබේ.