බූස්ස බන්ධනාගාරයේ රඳවා සිටින විශේෂ ගණයේ රැඳවියන් පිරිසක් ආරම්භ කළ ආහාර ගැනීමෙන් වැළකි සිටීමේ විරෝධතාවයෙන් රැඳවියන් අට දෙනෙකු ඉවත් වී තිබේ.
ඉල්ලීම් කිහිපයක් මුල් කරගනිමින් ඊයේ (10) දින උදෑසන සිට එම රැඳවියන් ආහාර වර්ජනයේ නිරතව සිටින බව බන්ධනාගාර ප්‍රකාශකයෙකු සඳහන් කළේය.
දරුණු ගණයේ අපරාධ සම්බන්ධයෙන් දඬුවම් නියම වී සිටින රැඳවියන් 40 දෙනෙකුගෙන් 32 දෙනෙකු එලෙස වර්ජනයේ නිරතව සිටී.
වර්ජනයේ නිරතව සිටින රැඳවියන් අතරට “කංජිපානී ඉම්රාන්”, “පොඩි ලැසී” සහ “වෙලේ සුදා” ඇතුළු රැඳවියන් වන අතර “පොට්ට නවුෆර්”, “කැවුමා”, “ආමි සම්පත්” ඇතුළු රැඳවියන් 06 දෙනෙකු වර්ජනයට සහය දක්වා නොමැති බව වාර්තා වේ.
කොවිඩ්-19 රෝග ව්‍යාප්තිය සමයේ ඥාතීන් හමුවිමට නොහැකිවීම හේතුවෙන් ලබාදුන් දුරකථන පහසුකම ඉවත් කිරීම, රැඳවියන් හමුවට එන නීතිඥවරුන් පරික්ෂා කිරීම, විශේෂ කාර්යය බලකාය විසින් සිදුකරන පරික්ෂාවන් ඇතුළු කරුණුවලට විරෝධය පළ කිරීම ඔවුන්ගේ වර්ජනයේ අරමුණ බව වාර්තා වේ.