රක්ෂිත බන්ධනාගාරගතව සිටින ඉඳුනිල් කුමාර නොහොත් ඉන්ද්‍ර නමැති පාතාල කල්ලි සාමාජිකයාගේ ප්‍රධාන ගෝලයෙකු ඇතුළු තිදෙනෙක් අත්අඩංගුවට ගත් බව පොලිස් විශේෂ කාර්ය බලකාය පවසයි.
පොලිස් විශේෂ කාර්ය බලකායේ සංවිධානාත්මක අපරාධ මර්ධන ඒකකය විසින් හංවැල්ල ඇඹුල්ගම ප්‍රදේශයේ දී එම සැකකරුවන් අත්අඩංගුවට ගෙන ඇත.
අත්අඩංගුවට ගෙන ඇත්තේ තනිප්පුලි ආරච්චිගේ දසුන් බුද්ධික ජයතිලක නොහොත් ‘අක්කු’ යන පාතාල සාමාජිකයා සහ තවත් දෙදෙනෙක් බව පොලිස් විශේෂ කාර්යය බලකාය සඳහන් කළේය.
අත්අඩංගුවට ගන්නා අවස්ථාවේ දී ඔවුන් සතුව ව්‍යාජ පිස්තෝලයක්, කඩු 03ක්, කිනිස්සක් සහ කේරළ ගංජා ග්‍රෑම් 325ක් තිබී ඇත.
අත්අඩංගුවට ගත් සැකකරුවන් වැඩිදුර විමර්ශන සඳහා හංවැල්ල පොලිස් ස්ථානය වෙත භාරදුන් බව පොලිස් විශේෂ කාර්ය බලකාය සඳහන් කළේය.