සංචාරක අමාත්‍යාංශ කාර්යාලය කොළඹ පාර්ක් වීදියේ නව ගොඩනැගිල්ලකට ගෙන යෑමට සැලසුම් කර ඇති අතර එහි මාසික කුලිය ලෙස රුපියල් ලක්ෂ 200ක් අමාත්‍යාංශයෙන් වෙන් කරගෙන ඇතැයි වාර්තා වේ.
සිදු කිරීමට සූදානම් වන නාස්තිකාර වියදම සම්බන්ධව අමාත්‍යාංශ නිලධාරීන් තුළ ද දැඩි විරෝධයක් සහ කලකිරීමක් ඇතිව තිබෙන බව ද වාර්තා වන අතර මීට විරෝධය පළ කරන නිලධාරීන් අවධාරණය කර සිටින්නේ සංචාරක අමාත්‍යාංශයේ වාර්ෂික ආදායම බිලියන 3-4 ක් වුවත් තවත් ගොඩනැගිලි අමාත්‍යාංශය සතුව තිබිය දී මාසිකව මෙවැනි වියදමක් දැරීම ජාතික අපරාධයක් මෙන්ම වත්මන් ආණ්ඩුවේ කීර්තිනාමයට ද හානි සිදු කරන්නක් වන බවයි.
විශ්වාසවන්ත ආරංචි මාර්ග සඳහන් කරන ආකාරයට අමාත්‍යවරයා මෙම මුදල් වෙන් කරගෙන තිබෙන්නේ කැබිනට් අනුමැතියකින් තොරව, හිතුමතේ සිය නිල බලය උපයෝගී කරගෙනය.
එම ආරංචි මාර්ග වැඩිදුරටත් සඳහන් කරන ආකාරයට මෙම ගනුදෙනුව සඳහා මැදිහත්ව සිටින්නේ වත්මන් සංචාරක අමාත්‍ය ජෝන් අමරතුංගගේ බෑණා වන කොමර්ෂල් බැංකුවේ හිටපු සභාපතිවරයකු වන දිනේෂ් වීරක්කොඩි ය.
මේ වන විට සංචාරක අමාත්‍යාංශය පවතිනුයේ කොල්ලූ‍පිටියේ තිබෙන සංචාරක මණ්ඩල ගොඩනැගිල්ලේ කොටසක් සහ රක්ෂණ සංස්ථා ගොඩනැගිල්ලේ කොටසක් වශයෙන් ස්ථාන දෙකකය.
එජාප අමාත්‍යවරුන් ද කළ කිරී සිටින්නේ යන එන මං නොමැතිව සිටින තමන්ට අමාත්‍යාංශයක් කුලියට ගැනීම වෙනුවෙන් මාසික කුලිය රුපියල් ලක්ෂ 50ක් හෝ ඊට ආසන්න මුදලක් වෙන් කර දෙන ලෙසට කළ ඉල්ලීම් පවා ප‍්‍රතික්ෂේප කළ ආණ්ඩුවේ ප‍්‍රධානීන්, කරන්නට සූදානම් වන මහජන මුදල් නාස්තිය පිළිබඳ කාරණයේ දී නිහඬව සිටීම පිළිබඳවය.