මේ වන විට COVID 19 හෙවත් කොරෝනා වෛරසය අසාදනය වූවන් ලෙස වාර්තා වන්නේ වැලිසර නාවික හමුදා කඳවුරේ සාමාජිකයන් හා ඔවුන්ගේ ආශ්‍රිතයින්ගෙන් පොකුරු හා බාහිරින් වාර්තා වීම සම්පූර්ණයෙන් නතර වී තිබෙන බව සෞඛ්‍ය අමාත්‍යාංශයෙන් වසංගත විද්‍යා ඒකකයේ ප්‍රධානී විද්‍යාඥ සුදත් සමරවීර මහතා පවසනවා.
ඒ අනුව COVID 19 රට තුළ සෑහෙන දුරට පාලනය කර තිබෙන බවට නිගමනය කළ හැකි බවයි සුදත් සමරවීර මහතා සඳහන් කරන්නේ.
මෙලෙස පාලනය කළත් කොතැනින් හෝ එම රෝගියෙක් මතු වීමේ සම්භාවිතාව ඇති හෙයින් එය සිහිතබාගෙන වැඩ කළ යුතු බව හෙතෙම පවසනවා.
රෝගීන් වාර්තා වීම වළක්වා ගැනීම සඳහා පුද්ගල දුරස්ථභාවය පවත්වාගැනීම, අත් පිරිසිදු කරගැනීම, කැස්ස හා කිවිසුම් යාමේදී අනුගමනය කළ යුතු දෑ පිළිපැදීම,යම් කිසි අයුරකින් COVID 19 රෝග ලක්ෂණ තිබෙන්නේ නම සමාජය ආශ්‍රය නොකළ යුතු වීම, ආදී කරුණු අනුගමනය කිරීම ඉතාම වැදගත්.
අහඹු නියැදි පරික්ෂාව සිදුවනවා.
විශේෂයෙන් පොදු ස්ථානවල ගැවසීමේදී සෞඛ්‍ය අංශ ලබා දී තිබෙන උපදෙස් පිළිපදින්න. ඕනෑම ස්ථානයකට ඇතුල් වන විට අත් පිරිසිදු කරගැනීම හා හැකි තරම් මතුපිට පෘෂ්ඨ මත අත නොතැබීම ආදිය කළ යුතු වනවා.
දැනට සිදුවන ශරීර උෂ්ණත්වය මැන බැලීමත් රෝග පාලනයට දායකත්වය දෙනවා. එයට අනුගත වන ලෙස ජනතාවගෙන් ඉල්ලනවා.