කුරුණෑගල ශික්ෂණ රෝහලේ හදිසි අනතුරු ප්‍රතිකාර ඒකකය අද (09) සවස සිට තාවකාලිකව සම්පුර්ණයෙන්ම වසා දැමීමට රෝහල් බලධාරීන් පියවර ගෙන තිබේ.
කුරුණෑගල ශික්ෂණ රෝහලේ නියෝජ්‍ය අධ්‍යක්ෂ වෛද්‍ය චන්දන කැඳන්ගමුව මහතා සදහන් කළේ හදිසි රෝගී තත්ත්වයක් හේතුවෙන් ප්‍රතිකාර සඳහා රෝහලට පැමිණි රෝගියකුගෙන් කොරෝනා වෛරස් ආසාදන තත්ත්වයක් පෙන්නුම් කිරීම නිසා එම ඒකකය තාවකාලිකව වසා දැමූ බවයි.
අද දහවල් හෘදයාබාධයක් බව පවසමින් කුරුණෑගල ශික්ෂණ රෝහලට ප්‍රතිකාර සඳහා ඇතුළු වූ රෝගියෙකු පරීක්ෂා කිරීමේදී දැඩි උණ රෝගයෙන් පෙළෙන බව අනාවරණය වී ඇත.
අනතුරුව ඔහු ප්‍රතිකාර සඳහා රෝගීන් ඇතුළත් කරගන්නා හදිසි ප්‍රතිකාර ඒකකයේ බොහෝ වේලාවක් ගතකර තිබේ.
සැකසහිත තත්ත්වය හමුවේ ඔහු කොරෝනා රෝගියෙකුදැයි හඳුනා ගැනීම සඳහා රෝහලේ කොරෝනා රෝග ප්‍රතිකාර ඒකකයට ඇතළත් කර තිබේ.
ඔහුගේ රුධිර පරීක්ෂණ වාර්තාව ලැබෙන තුරු සැකසහිත බැවින් ඔහුට ප්‍රතිකාර කරනු ලැබූ හදිසි අනතුරු ප්‍රතිකාර ඒකකය තාවකාලිකව වසා දැමීමට පියවර ගෙන ඇත.