හෙරෝයින් මත්කුඩු ග්රෑම් 4යි දශම 3ක් ළග තබා ගැනීම සහ ජාවාරම් කිරීමේ චෝදනාවට වරදකරු වූ පුද්ගලයෙකුට ජීවිතාන්තය දක්වා සිර දඩුවම් නියම කර තිබෙනවා.
කොළඹ මහාධිකරණ විනිසුරු ගිහාන් කුලතුංග මහතා විසින් මෙම නියෝගය ලබා දුන් බවයි අප අධිකරණ වාර්තාකරු කියා සිටියේ.
38 හැවිරිදි, තිදරු පියෙක් වන අදාළ පුද්ගලයා 2011 වසරේ අගෝස්තු මස 13 වනදා පොලිස් මත්ද්‍රව්‍ය නාශක කාර්යංශයේ නිලධාරීන් විසින් අත්අඩංගුවට ගෙන තිබුණා.
දීර්ඝ නඩු විභාගයකින් අනතුරුව තීන්දු ප්‍රකාශයට පත් කරමින් කොළඹ මහාධිකරණ විනිසුරු ගිහාන් කුලතුංග මහතා කියා සිටියේ විත්තිකරුට එරෙහිව එල්ලවී ඇති චෝදනා සාධාරණ සැකයකින් තොරව ඔප්පු වී ඇති බවයි.