සමස්ත ලංකා ජම්මියතුල් උලමා (ACJU), හෙවත් මුස්ලිම් විද්වතුන්ගේ සංගමය විසින් මුස්ලිම් ත්‍රස්තවාදී කණ්ඩායම්වල ඉතිරි සාමාජිකයන්ගෙන් ආරක්ෂක අංශවලට බාරවන ලෙස ඉල්ලීමක් කෙරේ.
ඔවුන් ආරක්ෂක අධිකාරීන් වෙත බාරවුවහොත්, රජය සමග එක්ව නොමග ගිය තරුණයන් පුනරුත්ථාපනය කිරීම සඳහා වැඩපිළිවෙලක් සකසා ගත හැකි බව උලමා හී මාධ්‍ය ලේකම් ඈෂ්-ෂෙයිඛ් ෆාසිල් ෆාරුක් මවුලවිවරයාප්‍රකාශ කළේය.
තවදුරටත් අදහස් දක්වන ඔහු සඳහන් කළේ පසුගිය ජනවාරියේදී තව්හිත් ජමාත් සංවිධානයේ නායක සහ්රාන් හෂීම් විසින් පවත්වන ලද දේශනා පිළිබඳ තොරතුරු හිටපු ආරක්ෂක ලේකම්වරයාට භාර දී ඇති බවයි.
සමස්ත මුස්ලිම් සමාජයම ත්‍රස්තවාදයට එරෙහිව සිටි බවත්, ඔවුන් තම පූර්ණ සහාය ආරක්ෂක හමුදාවේ ත්‍රස්තවාදය මුලිනුපුටා දැමීමේ වැඩපිළිවෙල සඳහා ලබාදෙමින් පවතින බවත් ඔහු අවධාරණය කරයි.
පසුගිය දෙසැම්බරයේදී මාවනැල්ල බුදු පිළිම විනාශ කිරීමට සම්බන්ධ පුද්ගලයෙක් සැඟව සිට පැමිණ තම දරුවා සහ බිරිඳ දෙමාපියන් වෙත භාරදීමට උත්සාහ කළ අවස්ථාවේ, දෙමාපියන් විසින් ඔවුන්ව බාර නොගෙන ආරක්ෂක අංශ වෙත බාර දුන් බවද ඔහු සිහිපත් කළේය.
ෆාරුක් මවුලවි වරයා සඳහන් කරන්නේ, එම කාන්තාවගෙන් ලද තොරතුරු අනුව බුදු පිළිම විනාශ කිරීමට සම්බන්ධ තවත් පුද්ගලයන් කිහිපදෙනෙකු ද අත්අඩංගුවට ගැනීමට හැකි වූ බවයි.
ත්‍රස්තවාදී කටයුතු සඳහා ආධාර අනුබල ලබාගැනීම සඳහා මුදල් ප්‍රදානය කිරීමට යම් කණ්ඩායම් උත්සාහ කළ බව කල්මුණේ ප්‍රදේශවාසීන් විසින් ආරක්ෂක අංශ වෙත පැමිණිලි කර ඇති බව ද ඔහු පෙන්වා දුන්නේය.