ජනතාව ආලෝකය බලාපොරොත්තුවෙන් සිටියත් ඔවුන්ට ලැබෙන්නේ අන්ධකාරය බවත් ඒ අනුව වසලයා කවුද බ්‍රාහ්මණයා කවුද යන්න ජනතාව විසින් තීරණය කරනු ඇති බවත් අමාත්‍ය සජිත් ප්‍රේමදාස මහතා පවසයි.
දෙමව්පියන්ගේ නම් කියමින් ප්‍රසිද්ධ වීමට ඇතැමුන් කටයුතු කරන බවට පසුගියදා රවී කරුණානායක මහතා කළ ප්‍රකාශයකට පිළිතුරු ලබා දෙමින් සජිත් ප්‍රේමදාස මහතා මේ බව ප්‍රකාශ කළේය.
මෙසේ අනුන්ට චෝදනා කරන පුද්ගලයින්ම ලංකා ඉතිහාසයේ වසලම වැඩ කළ බවත් ඔවුන් තැනකට ගියොත් එය ඉවරම කරන බවත් වගකීමක් භාරගත්තොත් එම වගකීම විනාශ කරන බවත් අමාත්‍යවරයා සඳහන් කළේය.
එසේම, කිසිම දිනක බැංකු කඩා බ්‍රාහ්මණයෙක් විය නොහැකි බව පැවසූ අමාත්‍යවරයා තමන් හෝ තමන්ගේ භාර්යාව යොදවා අල්ලස් ගැනීම බ්‍රාහ්මණ ක්‍රියාවක් නොවන බවයි ප්‍රකාශ කළේ.
එහෙයින් ඉතාම කෙටි කාලයක් තුළ වසලයින් කවුද බ්‍රාහ්මණයින් කවුද යන්න තීරණය කිරීමට ලංකාවාසී ජනතාවට ප්‍රඥාව පහළ වේවායි තමන් ප්‍රාර්ථනා කරන බවත් අමාත්‍යවරයා වැඩිදුරටත් පැවසීය.
සජිත් ප්‍රේමදාස මහතා මේ බව පැවසුවේ ඊයේ (16) ලුණුගම්වෙහෙර ප්‍රදේශයේ පැවති උත්සවයකට එක් වෙමිනි.