අල්ලස් නඩුවකට අදාළව අධිකරණය හමුවේ සාක්ෂි ලබා දීම සඳහා හිටපු වෙළෙඳ හා පාරිභෝගික කටයුතු ඇමැති රවී කරුණානායක මහතා අද (25) කොළඹ අතිරේක මහේස්ත‍්‍රාත් චන්දන කලංසූරිය මහතා ඉදිරියේ පෙනී සිටියේය.
සතොස මගින් ආනයනික සුදු කැකුලු සහල් විකිණීමේ කි‍්‍රයාවලියේදී රජයට අයුතු සහගත හෝ නිතිවිරෝධී ලෙස පාඩුවක් විය හැකි බව දැන දැන මිල දර්ශකයට පටහැනිව සහල් මෙටි‍්‍රක් ටොන් 1000ක් විකිණීමට නියෝග කර රුපියල් මිලියන 4 ක් රජයට පාඩු කළැයි එවකට සතොස වැඩබලන සාමාන්‍යාධිකාරී සුනිල් මිලේතියස් විමල් පෙරේරා මහතාට එරෙහිව අල්ලස් කොමිසම විසින් ගොනු කර තිබූ නඩුවකට අදාළව සාක්ෂි විභාගය සඳහා හිටපු අමාත්‍යවරයා එලෙස අධිකරණයේ පෙනී සිටියේය.
මෙම සිද්ධියට අදාළ ස්ථීර මහෙස්ත‍්‍රාත්වරිය රාජකාරි නිවාඩු ලැබ සිටීම හේතුවෙන් නඩුවට අදාළව සාක්කි ලබාදීම ලබන ජුලි 20 වැනි දා ට කල් තැබූ අධිකරණය එදිනට අධිකරණයේ පෙනී සිටින ලෙසට හිටපු අමාත්‍යවරයාට නැවත සිතාසි නිකුත් කරනු ලැබීය.