කිරිපිටි කිලෝවක මිල රුපියල් 200 කින් ඉහළ දැමීමේ යෝජනාවට ලබන සඳුදා රැස්වන කැබිනට් මණ්ඩලයේ අනුමැතිය ලැබේ යැයි විශ්වාස කරන ආනයනකරුවන්ගේ ප්‍රකාශක ලක්‍ෂ්මන් වීරසූරිය මහතා අද (2) පස්වරුවේ පැවසීය.
අයවැය දක්වා අවම වශයෙන් කිරිපිටි කිලෝවක මිල රුපියල් 200 කින් ඉහළ දැමීමට සාකච්ඡාවලදී පොරොන්දුවී ඇතැයි කී ලක්‍ෂ්මන් වීරසූරිය මහතා එසේ වැඩි වුවද තවත් රුපියල් 150 පාඩුවක් ඇති බවත් සඳහන් කළේය.
ආනයනකරුවන් පාඩුව කිරිපිටි සැපයීමට සූදානම් නොමැති නිසා හිඟය නැති වීමට නම් මිල වැඩි කිරීම අනිවාර්යෙන්ම වියයුතු බවත් මිල වැඩි කළ ද හිඟය සම්පූර්ණයෙන්ම නොව ක්‍රමානුකූලව අඩුවේ යැයි වීරසූරිය මහතා කීය.
වරායේ සිරවී ඇති කිරිපිටි කිලෝ 360,000 බදාදා නිදහස් කරගත හොත් බ්‍රහස්පතින්දා සිට බෙදාහරින බවත් කඩවල රාක්ක පිරෙන්න නම් අඩුම තරමේ තවත් සති හතරක් පහක් ගතවේ යැයි වීරසූරිය මහතා වැඩි දුරටත් පැවසීය.