කොවිඩ් ආසාදිතයකුගේ මළ සිරුරක් ශීතාගාරයක තැන්පත්කර තැබීම හේතුවෙන්, මහනුවර රෝහලේ පශ්චාත් මරණ පරීක්ෂණ කිරීමට නොහැකි වූ මළසිරුරු 5 ක් මෘත ශරීරාගාරයේ තිබෙන බව මහනුවර ජාතික රෝහලේ අධිකරණ වෛද්‍ය විශේෂඥ සිව සුබ්‍රමනියම් මහතා පවසයි.
කෝවිඩ් ආසාදිතව මිය ගිය තැනැත්තා මහනුවර ජාතික රෝහලේදී පසුගිය 19 වැනි දින මරණයට පත්වී ඇති අතර අකුරණ ප්‍රදේශයේ පදිංචි කරුවෙකු බව අනාවරණය වී ඇත. මියගිය පුද්ගලයාගේ දේහයට යළිත් පී.සී.ආර් පරීක්ෂණයක් සිදුකරන ලෙස ඔහුගේ ඥාතීන් නිතීඥවරයෙකු මගින් මහනුවර ජාතික රෝහලේ අධ්‍යක්ෂවරියගෙන් ඉල්ලා තිබිණි. එය ප්‍රතික්ෂේපවීමෙන් පසු මළ සිරුර ආදාහනය කිරීම සඳහා මරණ සහතිකය බාර ගැනීමට ඥාතීහු පැමිණ නොසිටියහ. එබැවින් මළ සිරුර මෘත ශරීරාගාරයේ අධි ශීතාගාරයේ තැන්පත් කිරීමට රෝහල් බලධාරීන් පියවර ගෙන තිබිණි.
මළ සිරුර ආදාහනය කිරීම සඳහා අධිකරණ නියෝගයක් ලබා ගන්නා ලෙස මහනුවර ජාතික රෝහලේ අධිකරණ වෛද්‍ය විශේෂඥ සිව සුබ්‍රමනියම් මහතා අලවතුගොඩ පොලීසියට දැනුම් දී තිබුණත් පොලීසිය මෙතෙක් එම නියෝගය ලබාගෙන නොමැති බවද මහනුවර ජාතික රෝහලේ අධිකරණ වෛද්‍ය විශේෂඥ සිව සුබ්‍රමනියම් මහතා පැවසීය.
මෙම තත්ත්වය තුළ මෘත ශරීරාගාරයේ වැඩකටයුතු සිදුකිරීම සෞඛ්‍යයට තර්ජනයක් බව පවසමින් වෛද්‍යවරු ඇතුළු සේවක මණ්ඩලය වැඩ වර්ජනය ක්‍රියාත්මක කළහ. වර්ජනය හේතුවෙන් රෝහලේදී සාමාන්‍ය රෝග තත්ත්වයන් නිසා මියයන පුද්ගලයින්ගේ මළ සිරුරු ලබා ගැනීමටද ඔවුන්ගේ ඥාතීන්ට නොහැකි වී ඇත.
කොවිඩ් ආසාදිතයාගේ මරණය සම්බන්ධයෙන් අදාළ වාට්ටුව භාර විශේෂඥ වෛද්‍යවරයා විසින් මරණයට හේතුව පැහැදිලිව දන්වා තිබියදී මහේස්ත්‍රාත් නියෝගයක් නොමැතිව පශ්චාත් මරණ පරීක්ෂණයක් සිදු කළ නොහැකි බව මහනුවර ජාතික රෝහලේ හදිසි මරණ පරික්ෂක බී විජේකෝන් මහතා ද පැවසීය.
නිරෝධායන නීති ප්‍රකාරව 2020 නොවැම්බර් 04 වැනි දින නිකුත් වු අතිවිශේෂ නිරෝධායන පනතට අනුව කොවිඩ් ආසාදිත රෝගියකු මියගිය පසු අදාළ දේහය පිළිබද අවසන් කටයුතු සිදුකිරීමේ බලය රෝහල් බලධාරින්ට ඇති බවද මහනුවර ජාතික රෝහලේ හදිසි මරණ පරික්ෂක බී විජේකෝන් මහතා කීවේය.
මියගිය පුද්ගලයාගේ නිරෝධායනය වෙමින් සිටින ඥාතීන් අද (04) දින රෝහල වෙත පැමිණෙන බව දන්වා තිබෙන හෙයින් අදාළ දේහය පිළිබද තීරණයක් ඉන්පසු ගත හැකි බව මහනුවර ජාතික රෝහලේ වැඩබලන අධ්‍යක්ෂිකා ඉරේෂා ප්‍රනාන්දු මහත්මිය පැවසුවාය.
කොවිඩ් ආසාදිත මළ සිරුරක් ආදාහනය කිරීමට පියවර නොගෙන සති දෙකක කාලයක් මෘත ශරීරාගාරයේ අධි ශීතකරණයක තබා ගැනීමෙන් සෞඛ්‍යයට තර්ජනයක් වන බව පවසමින් මහනුවර ජාතික රෝහලේ මෘත ශරිරාගාරයේ සේවක මණ්ඩලය අද (03) වැඩවර්ජනයක නිරත වූහ.