අනුරාධපුර බන්ධනාගාරයේ උපවාසයක යෙදී සිටින සුලක්‌ෂණ්‌, රාසතුරෙයි සහ ගනේෂන් නමැති හිටපු කොටි ක්‍රියාකාරීන් තිදෙනා නාවික භටයන් 18 ක් සහ හමුදා භටයන් 6 ක් වෙඩි තබා මරා පුළුස්‌සා දැමීමේ බිහිසුණු අපරාධයට සම්බන්ධවූවන් බව ත්‍රස්‌ත මර්දන ආරංචි මාර්ග ඊයේ (23දා) හෙළි කළේය.
මෙම හිටපු ත්‍රස්‌තයන් තිදෙනා මුදාගැනීම සඳහා යාපනය විශ්වවිද්‍යාලයේ ශිෂ්‍ය සංවිධානයේ සභාපති ක්‍රිෂ්ණාවිනස්‌ සහ ලේකම් ජැක්‌සන් සහ සූලක්‌ෂන්ගේ සොහොයුරිය වූ ක්‍රිෂාන්ති ජනාධිපති මෛත්‍රිපාල සිරිසේන මහතා හමු වී ඇත.
තම නඩුව අනුරාධපුර අධිකරණයෙන් වවුනියාවට මාරු කරන ලෙසද මෙම හිටපු කොටි ත්‍රස්‌තයන් තිදෙනා රජයෙන් ඉල්ලා ඇත.
උතුරේ තරාවෙඩිපායි කොටි කඳවුරේ සිරගත කර සිටි එම හමුදා සහ නාවික භටයන් පිරිස වෙඩි තබා මරා පුළුස්‌සා දැමූ ස්‌ථානයද ත්‍රස්‌ත මර්දන බලධාරීන් සොයාගෙන තිබුණි.
කීර්ති වර්ණකුලසූරිය – දිවයින