යාපනයට බලපා ඇති දැඩි නියං තත්ත්වය හේතුවෙන් මේ වනවිට පවුල් 33,000කට අයත් පුද්ගලයින් 121,000කට පමණ පානීය ජලය ඇතුලු අනෙකුත් අවශ්‍යතා සඳහා ජලය නොමැතිව දැඩි පීඩාවකට පත්ව ඇතැයි යාපනය දිසාපති නාගලිංගම් වේදනායගම් මහතා කියා සිටියි.
යාපනයේ කයිට්ස්, මරදන්කේනි, කරෙයිනගර්, සංදිලිපායි, සංගත්තානෙයි, වේලනයි යන ප්‍රදේශවල මෙම නියං තත්ත්වය දැඩිව බලපා ඇති බව ඔහු වැඩි දුරටත් සඳහන් කරයි.
මේ වන විට ආපදා කලමනාකරණ අමාත්‍යංශය විසින් අවශ්‍ය පහසුකම් යාපනය දිස්ත්‍රීක් ලේකම් කාර්යාලය හරහා ලබා දීමට කටයුතු යොදා තිබේ.
යාපනය පුංකුඩතිව් හා මණ්ඩතිව් යන ප්‍රදේශයන්හි ජනතාව පානීය ජලය නොමැතිව දැඩි පීඩාවන්ට පත්ව සිටින අතර ඔවුන් ජලය නොමැතිව මාර්ග අසල දිනය පුරා රැඳී සිටිමට සිදුව ඇති බවත් ප්‍රදේශයේ පිහිටි සියලුම ජලය පිහිටි ස්ථාන සිඳී ගොස් ඇති බවත් එම වැසියෝ කියා සිටියි.
කෙසේ වෙතත් ඉදිරියටත් වර්ෂාව නොලැබුණහොත් අවදානමට පත් වැසියන්ගේ තත්ත්වය තවදුරටත් බරපතල වන බවටද දිසාපතිවරයා වැඩි දුරටත් කියා සිටියි.
