ආරක්ෂක හමුදා භාරයේ තිබූ ඉඩම් ප්‍රමාණයෙන් අක්කර දෙදහස් දෙසිය විසි එකක් (2221) මේ වන විට උතුරේ ජනතාවට ලබා දී ඇති බව යුද හමුදාපති ලුතිනන් ජෙනරාල් ක්‍රිෂාන්ත ද සිල්වා මහතා පවසයි.
වසර එකහමාරක් වැනි කාලයක් තුළදී මේ ඉඩම් මුදා හැර ඇති අතර, එම ඉඩම් අතර පෞද්ගලික අංශයේ මෙන්ම රජයේ ඉඩම්ද වන බව යුද හමුදාපතිවරයා පවසයි.
ආරක්ෂක හේතු මත තවත් ඉඩම් ප්‍රමාණයක් ආරක්ෂක අංශ වෙත පවරාගෙන සිටිය ද සිවිල් ජන ජීවිතය නගා සිටුවීම සඳහා අවශ්‍ය සහයෝගය යුද හමුදාව නොඅඩුව ලබා දෙන බව යුද හමුදාපතිවරයා පැවසීය.
යුද්ධය නිසා අවැතැන් වූ පවුල් සිටින කඳවුරු 31ක් ඇතැයිද, මේ සියලු කඳවුරු තුළ පවුල් 920කට ආසන්න පිරිසක් ඇතැයිද කී සිල්වා මහතා ඒවායේ සිටින පවුල් 490කට පමණ කිසි දිනක ඉඩම් තිබී නැතැයිද ඔහු හෙළි කළේය.
මේ වන විට නැවත ඉඩම් ලබා ගන්නා උතුරේ ජනතාව සඳහා විශේෂ නිවාස ව්‍යාපෘති ක්‍රියාත්මක කරමින් සිටින බව ද හෙතෙම පවසයි.
ඒ අනුව, මේ අවතැන්වූවන්ට ලබාදීමට කීරමලේ තෝරාගත් රජයේ ඉඩමක අක්කර හතළිස් හතක භූමි ප්‍රමාණයක් තුළ නිවාස සියයක් ගොඩනැගීමේ විශේෂ ව්‍යාපෘතියක් දැනටමත් ආරම්භ කර ඇති බව පවසන යුද හමුදාපතිවරයා, එම ඉදිකිරීම් කටයුතු සඳහා යුද හමුදා සාමාජිකයන් මෙන්ම පුනරුත්ථාපනය කරන ලද එල්.ටී.ටී.ඊ. සාමාජිකයන් ද එක් කණ්ඩායමක් ලෙස යොදවන බව වැඩිදුරටත් කියා සිටියි.