නැගෙනහිර පළාත් මහඇමති නසීර් අහමඩ් විසින් නාවික හමුදා උසස් නිලධාරියෙකුට අශීලාචාර ලෙස බැණ වැදීමේ සිද්ධියෙන් පසු ආරක්ෂක අංශ ක්‍රියා කර ඇති ආකාරය සම්බන්ධයෙන් දින තුනක් ඇතුළත වාර්තාවක් ලබා දෙන ලෙසට අගමැතිවරයා විසින් ආරක්ෂක අමාත්‍යාංශයට නියෝග කර තිබෙනවා.
සිද්ධියෙන් පසු ආරක්ෂක අංශ ක්‍රියාකාර ඇති ආකාරය පිළිබදව ඇමති පිරිසක් විසින් අරලියගහ මන්දිරයේදී අගමැතිවරයාට කරුණු දක්වා ඇති අතර, අග්‍රාමාත්‍යවරයා දකුණු කොරියාවේ සංචාරයට පිටත්ව යෑමට පෙර ආරක්ෂක ලේකම් කරුණාසේන හෙට්ටිආරච්චි හා නාවික හමුදාපති රවීන්ද්‍ර විජේගුණවර්ධන යන මහත්වරුන් කැඳවා නැගෙනහිර පළාත් ප්‍රධාන අමාත්‍යවරයා සමග දුරකථනයෙන් කථා කොට සිද්ධිය සමථයකට පත් කර තිබියදී ආරක්ෂක අංශවල ඇතැම් නිලධාරීන් ගැටලු මතුවන ආකාරයෙන් කටයුතු කර ඇති බවට මෙහිදී අමාත්‍යවරුන් අග්‍රාමාත්‍යවරයා හමුවේ ප්‍රකාශ කර තිබේ.
අමාත්‍යවරුන් කළ ඉල්ලීම්වලට ක්ෂණිකව ප්‍රතිචාර දැක්වූ අග්‍රාමාත්‍යවරයා ආරක්ෂක අමාත්‍යාංශය වෙත මෙම නියෝගය සිදුකර ඇත. හමුදා කඳවුරුවලට ඇතුල්වීම තහනම් කිරීමට බලය ඇත්තේ ජනාධිපතිවරයාට පමණක් බවත් ජනාධිපතිවරයාගේ අනුමැතියකින් තොරව කිසිම පුද්ගලයකුට එවැනි තීරණ ගත නොහැකි බවද අග්‍රාමාත්‍යවරයා එහිදී අවධාරණය කර ඇත.