පොදු වැසිකිළිවල නොමිලේ සනීපාරක්ෂක තුවා තැබීමට යෝජනා කරමින් X සටහනක් තැබූ ජපානයේ මියේ ප්‍රාන්තයේ පාර්ලිමේන්තුව නියෝජනය කරන සාමාජිකාවකට, ඇගේ විද්‍යුත් තැපෑල ඇතුළුව ඩිජිටල් මාධ්‍ය ඔස්සේ මරණ තර්ජන 8000කට ආසන්න සංඛ්‍යාවක් එල්ල වූ පුවතක් විදෙස් මාධ්‍ය වාර්තා කරයි.
නමින් අයකා යොෂිඩා වන ඇය, ඉකුත් දිනෙක හදිසි ඔසප් වීමකට මුහුණ පා තිබෙන අතර සනීපාරක්ෂක තුවා ළඟ නොමැතිකමින් අපහසුතාවට පත්ව තිබේ. මෙවැනි අවස්ථාවන්ට මුහුණ දෙන කාන්තාවන් වෙනුවෙන් භාවිතයට ගැනීම සඳහා පොදු වැසිකිලි වැනි ස්ථාන වල සනීපාරක්ෂක තුවා තැබීම පිළිබඳ අදහස ඇයට ඇති වී තිබෙන්නේ මෙම අවස්ථාවට මුහුණ දීමත් සමගයි.
“අද හදිසියේම මට ඔසප් වීම සිදු වුණා. අවාසනාවකට, මම ට්සු නගර ශාලාවට යන විට එහි නාන කාමරයේ තුවා තිබුණේ නැහැ. මම ගෙදර එනකම්ම මට ඒක හරියට දරාගන්න බැරි වුණා. අවුරුදු 27 දී පවා මට මේක වෙනවා. මගේ අදහස නම් වැසිකිළි කඩදාසි වගේ සෑම තැනකම සනීපාරක්ෂක තුවා තැබිය යුතු බවයි”
මෙම සටහනෙන් පසු ඇයට ලැබී තිබෙන ප්‍රතිචාර අදහාගන්නටත් අපහසුය. විශේෂයෙන්ම ජපානය වැනි දියුණු ශිෂ්ඨ සම්පන්න යැයි පැවසෙන රටක පවා කාන්තාව වෙත එල්ල වී තිබෙන අපකීර්තිමත් ප්‍රචණ්ඩකාරීත්වය සහ කාන්තාව පිළිබඳ තිබෙන ප්‍රතිගාමී ලිංගික ආකල්පයන් මේ ප්‍රතිචාරයන්ගෙන් පිළිබිඹු වෙයි.
කොවිඩ්-19 වසංගතය ආරම්භයේ සිට වයස අවුරුදු 18ත් 49ත් අතර කාන්තාවන්ගෙන් 8% ක් සනීපාරක්ෂක නිෂ්පාදන ලබා ගැනීමේ දුෂ්කරතා අත්විඳ ඇති බව ජපන් සෞඛ්‍ය අමාත්‍යාංශය විසින් 2022 දී කරන ලද සමීක්ෂණයකින් හෙළිව තිබේ.
1947 ජපානයේ කම්කරු ප්‍රමිති නීතිය කාන්තා සේවිකාවන්ට ඔසප් නිවාඩු ලබාගැනීම සඳහා අයිතිය ලබා දී තිබේ. එහෙත්, එම නිවාඩු සඳහා ගෙවිය යුතුද නැද්ද යන්න එම නීතියේ සඳහන්ව නැත. එසේම කාන්තාවකට ඔසප් නිවාඩු ගත හැකි දින ගණනද නිර්වචනය කොට නොමැති අතර, 2023 වසරේ සිදු කළ ජාත්‍යන්තර සමීක්ෂණයකින් හෙළිව ඇත්තේ ජපන් කාන්තාවන්ගෙන් 44% ක් දැඩි වේදනාවක් අත්විඳින විට පවා ඔවුන්ගේ ඔසප් කාලය තුළ නිවාඩු නොගන්නා බවයි. එසේම, ආර්තවහරණයේ රෝග ලක්ෂණ අත්විඳින ජපන් කාන්තාවන්ගෙන් 35% ක් ඔවුන්ගේ අපහසුතාවයන් නොතකා දිගටම වැඩ කරන බවද සඳහන් වේ.
යොෂිඩා තැපෑලෙන් ආ තර්ජන!
“ඇගේ වයසේදී, ඇය හදිසි සනීපාරක්ෂක තුවා රැගෙන යාමට දැන සිටිය යුතුය”
“හදිසි අවශ්‍යතා වෙනුවෙන් සනීපාරක්ෂක තුවා රැගෙන නොඑන සභා මන්ත්‍රී අයකා යොෂිඩාව මම මරා දමමි, ඇය හොඳින් දැන හඳුනා ගැනීමට තරම් වයසින් වැඩියි!”
ඇගේ X සටහනත් සමග ඉකුත් සිකුරාදා රාත්‍රී 8.00 සිට සඳුදා පස්වරුව දක්වා විනාඩියකට එකක් බැගින් මේ ආකාරයේ දරුණු තර්ජනය කිරීම් ඇතුළත් ඊමේල් පණිවුඩ ලැබී තිබෙන බව සඳහන් වන අතර, ඉන් සමහරක් ලිංගිකත්වය පදනම් කරගත් ප්‍රචණ්ඩකාරී තර්ජනය කිරීම් වන බවද සඳහන්ය.
තමා බිය ගැන්වීමේ සහ ප්‍රාන්ත සභා සාමාජිකාවක ලෙස ඇගේ ක්‍රියාකාරකම් මර්දනය කිරීමේ බලපෑමක් මෙම තර්ජනවල පිටුපසින් ඇති බව, මේ සම්බන්ධයෙන් අදහස් දක්වන ඇගේ මතය වී තිබේ.
එසේම, මෙම සිදුවීම ජපන් සමාජයේ විවෘතව කතා කරන කාන්තාවන් නිහඬ කිරීම අරමුණු කරගත් ස්ත්‍රී පුරුෂ භාවය මත පදනම් වූ ප්‍රචණ්ඩකාරීත්වයේ පිළිබිඹුවක් බවට එරට සමාජ විශ්ලේෂකයින් මත පළ කරයි.
සටහන – Chalana