ලංකා ඛනිජ තෙල් සංස්‌ථාව සතු කොළොන්නාව ඉන්ධන ගබඩා සංකීර්ණයේ අයිතිය ඉන්දීය ඔයිල් සමාගමට විකිණීමට ආණ්‌ඩුව රහසේම පිඹුරුපත් සකසා ඇතැයි එහි වෘත්තීය සමිති සඳහන් කරයි.
කලකට ඉහත කොලොන්නාව තෙල් ගබඩා සංකීර්ණය කොටස්‌ තුනකට බෙදා ඉන් එක්‌ කොටසක්‌ ඉන්දීය ඔයිල් සමාගමට විකිණීමට එවකට පැවැති රජය කටයුතු කළේය.
ඉතිරි කොටස්‌ දෙකෙන් තවත් එක්‌ කොටසක්‌ පෞද්ගලික අංශයේ වෙනත් සමාගමකට අලෙවි කිරීමට නියමිතව තිබිණි.
එසේ විකුණා දැමීමට නියමිතව තිබූ දෙවන කොටසේ අයිතිය ඉකුත් 2009 වසරේදී යළි සංස්‌ථාවට ලබා දීමට හිටපු ජනාධිපති මහින්ද රාජපක්‍ෂ මහතා පියවර ගත් අතර මේ අනුව කොලොන්නාව ගබඩා සංකීර්ණයේ අයිතිය සංස්‌ථාවට හිමි වූ බව එහි ශ්‍රී ලංකා නිදහස් සේවක සංගමයේ සභාපති බන්දුල සමන් කුමාර මහතා සඳහන් කළේය.
වත්මන් රජය එසේ සංස්‌ථාව සතු කොටස්‌ දෙකින් එක්‌ කොටසක්‌ යළි ඉන්දීය ඔයිල් සමාගමට විකුණා දැමීමට සුදානම් වන බවද පැවසූ හෙතෙම එසේ වුවහොත් කොලොන්නාව ගබඩා සංකීර්ණයේ අයිතිය එම සමාගම සතුවන බවද පැවසීය.
ආණ්‌ඩුවේ මෙම වැඩපිළිවෙළට එරෙහිව සංස්‌ථාවේ සියලු සේවකයන් පෙළ ගැසී සිටින බවද සඳහන් කළ ඒ මහතා ජනාධිපතිවරයා හා අගමැතිවරයා හමුවී මේ පිළිබඳ සාකච්ඡා කිරීමට බලාපොරොත්තු වන බවත් සාර්ථක විසඳුමක්‌ නොලැබුණහොත් දීපව්‍යාප්ත වැඩ වර්ජනයකට යැමට සංස්‌ථා වෘත්තීය සමිති තීරණය කර ඇති බවත් කීවේය.