භාණ්ඩ ආනයනයට පනවා ඇති සීමා ඉවත් කිරීමට පියවර ගන්නා ලෙස යුරෝපා සංගමය ශ්‍රී ලංකා රජයෙන් ඉල්ලීමක් සිදුකර තිබේ.
අදාළ තහනම හේතුවෙන් යුරෝපා නිෂ්පාදන රැසකට වෙළෙඳපොළට ඇතුළුවීම වැළකී ගොස් ඇති බවයි එම සංගමය පෙන්වා දෙයි.
යුරෝපා සංගමයේ නියෝජිතයින් සහ ශ්‍රී ලංකා රජයේ නියෝජිතයින් අතර පසුගියදා පැවැති ඒකාබද්ධ කොමිෂන් සභා රැස්වීමකදී එම ඉල්ලීම සිදුකළේය.
ගෝලීය වසංගතයේ බලපෑමත් සමග විදේශ විනිමය හිඟය සැලකිල්ලට ගනිමින් අත්‍යාවශ්‍ය නොවන භාණ්ඩ සඳහා තාවකාලික තහනමක් පැනවීමට ශ්‍රී ලංකා රජය පසුගිය සැප්තැම්බර් මාසයේ පියවර ගත්තේය.
මේ අතර පසුගියදා පැවැති යුරෝපා සංගමයේ තවත් සාකච්ඡාවකදී ත්‍රස්තවාදය වැළැක්වීමේ පනත භාවිතයට ගැනීම අවම කිරීම සහ චෝදනා නොමැතිව එම පනත යටතේ රඳවාගෙන සිටින පුද්ගලයින් ඇප මත මුදාහැරීම සඳහා පියවර ගන්නා ලෙසද ශ්‍රී ලංකා රජයෙන් ඉල්ලීම් සිදුකර ඇති බවට වාර්තා වේ.