සාමාන්‍ය සේවය යටතේ ගමන් බලපත්‍ර නිකුත් කිරීම අද (09)දිනයේ සිට යළි ආරම්භ කරන බව ආගමන විගමන දෙපාර්තමේන්තුව පවසයි.
නිවේදනයක් නිකුත් කරමින් එම දෙපාර්තමේන්තුව පවසන්නේ, අද දිනයේ භාර ගනු ලබන්නේ මැයි 05, 06 හා 09 දිනවල සාමාන්‍ය සේවය යටතේ ගමන් බලපත්‍ර ලබා ගැනීම සඳහා වේලාවක් වෙන්කර ගත් අයැදුම්පත්‍ර පමණක් බවයි.
ඊට අමතරව මැයි 5 වැනිදා සාමාන්‍ය සේවයක් යටතේ ගමන් බලපත්‍ර ලබා ගැනීම සදහා අයැදුම්පත් භාරදීමට පැමිණ, දෙපාර්තමේන්තුවෙන් අංකයක් සහ මුද්‍රාවක් ලබාගත් අයැදුම්කරුවන්ගේ අයදුම්පත් ද එදිනට භාර ගැනෙන බව, ආගමන විගමන දෙපාර්තමේන්තුව නිවේදනය කරයි.
මැයි මස 10 වැනිදා සිට ගමන් බලපත්‍ර අයැදුම්පත් භාරදීම සඳහා දිනයක් හා වේලාවක් වෙන්කර ගැනීමට අනිවාර්යයි.
ඒ සඳහා www.immigation.gov.lk වෙබ් අඩවියෙන් හෝ 070 710 10 60 දුරකථන අංකයෙන් දිනයක් හා වේලාවක් වෙන්කර ගත හැකි ය.
පරිගණක පද්ධතිය පිළිසකර කිරීමෙන් අනතුරුව කඩිනමින් එක්දින සේවය යටතේ ගමන් බලපත්‍ර නිකුත් කිරීමට කටයුතු කරන බව ද ආගමන විගමන දෙපාර්තමේන්තුව පවසයි.