ඇතැම් මන්ත්‍රීවරුන්ට පා ගමන් යාමට ස්වාධීන අයිතිය ඇති අයුරින්ම පක්ෂයේ විනය කඩ කරන උදවියට එරෙහිව පරීක්ෂණ පැවැත්වීමේ ස්වාධීන අයිතියත් ශ්‍රී ලංකා නිදහස් පක්ෂයට ඇතැයි එහි මහ ලේකම් කෘෂිකර්ම අමාත්‍ය දුමින්ද දිසානායක මහතා පවසයි.
පා ගමන් යාමට අයිතියක් ඇතිමුත් ඒකාබද්ධ විපක්ෂ මන්ත්‍රීවරුන්ගේ පා ගමන තමන් අනුමත නොකරන බවත්, ඔවුන් සම්බන්ධයෙන් විනය පරීක්ෂණ පැවැත්වීම පක්ෂයේ අභ්‍යන්තර කාරණාවක් බැවින් එහි තීන්දු තීරණ ඉදිරියේදී දැකගත හැකිවනු ඇති බවත් මහලේකම් වරයා පවසයි.
ඔහු මේ බව පැවසුවේ ඊයේ (1) මහනුවරදී පැවති උත්සව සභාවක් අමතමිනි.
මෙම පා ගමන තුළින් ආණ්ඩුව වෙනස් කිරීම හෝ වෙන යම් ක්‍රියාමාර්ගයක් ගත නොහැකි යැයි කී අමාත්‍යවරයා, පක්ෂ ක්‍රියාකාරීන් දින ගණනාවක් තිස්සේ ගමන් කර පා ගමන් ගිය ද ඔවුන්ට අවසානයේ ලබා ගත හැකි ඵලයක් නොමැති බවද දුමින්ද දිසානායක මහතා පැවසීය.