පුනරුත්ථාපනය වූ එල් ටී ටී ඊ සාමාජිකයන් විශේෂ වෛද්‍ය පරීක්‍ෂණයකට ලක්කිරීම සදහා අමෙරිකානු විශේෂඥ වෛද්‍යවරුන් කණ්ඩායමක් උතුරු පළාතට පැමිණ ඇතැයි වාර්තාවේ.
විශේෂඥ වෛද්‍යවරුන් පස් දෙනෙකුගෙන් යුත් කණ්ඩායමක් මෙලෙස පැමිණ සිටින බව උතුරු පළාත් සභාව රැස්වූ අවස්ථාවේදී අනාවරණ වී තිබේ.
එම පළාත් සභාවේ ඉල්ලීමක් මත පැමිණ සිටින මෙම කණ්ඩායමට රාජ්‍ය නොවන සංවිධානයක් මගින් අවශ්‍ය වියදම් දරණ බවද මෙහිදී අනාවරණ වී ඇත.
උතුරු පළාත් සභා සෞඛ්‍ය අමාත්‍ය පී. සත්‍යලිංගම් මහතා මේ බව ප‍්‍රකාශ කර ඇත්තේ දෙමළ ජාතික සන්ධාන මන්තී‍්‍ර එම් කේ සිවාජිලිංගම් මහතා නැගූ ප‍්‍රශ්නයකට ප‍්‍රතිචාර දක්වමිනි.
පුනරුත්ථාපනය වූ එල් ටී ටී ඊ සාමාජිකයන්ගේ ශරීරවලට විෂ එන්නත් කොට ඇත්දැයි සොයාබැලීම කඩිනම් කළයුතු බව එහිදී සිවාජිලිංගම් මන්තී‍්‍රවරයා ප‍්‍රකාශ කර ඇත.
ඒ පිළිබදව කලබල නොවිය යුතු බවත් අමෙරිකානු වෛද්‍ය කණ්ඩායමක් අදාළ පරීක්‍ෂණ කටයුතු සිදුකරගෙන යන බවත් පළාත් සෞඛ්‍ය අමාත්‍යවරයා මෙහිදී ප‍්‍රකාශ කර තිබේ.
පුනරුත්ථාපනය වූ හිටපු එල් ටී ටී ඊ සාමාජිකයන්ගේ ශරීරවලට විෂ එන්නත් කොට ඇත්දැයි සොයා බැලීමට ජාත්‍යන්තර පරීක්‍ෂණයක් පැවැත්විය යුතු බවට උතුරු පළාත් සභාවට පසුගියදා යෝජනාවක් ඉදිරිපත්විය.
(නෙත් නිව්ස්)