මත්පැන් පානය කරන්නන්ට ඡන්දය දීමෙන් වැළකී සිටින ලෙස ජනපති මෛත්‍රිපාල සිරිසේන මහතා පවසයි.
ජනපතිවරයා මේ කරුණු අනාවරණය කළේ පෙරේදා (30 දා) පොළොන්නරුව පළුගස්‌දමන ප්‍රදේශයේ පැවැති ජනහමුවක්‌ අමතමිනි.
මත්ද්‍රව්‍යවලට ඇබ්බැහි වූ කිසිදු අපේක්‍ෂකයකුට කුමන පක්‍ෂයක්‌ නියෝජනය කළද ඡන්දය ලබානොදෙන ලෙස මෙහිදී ජනතාවට පැවසූ ජනාධිපතිතුමා රටට සහ මතු පරපුරට ආදර්ශයක්‌ ලබාදිය හැකි මහජන නියෝජිතයන් පිරිසක්‌ රටට සහ ගමට තෝරා පත්කරගත යුතු බවද අවධාරණය කළේය.
අද රට හමුවේ පවතින ප්‍රධාන අභියෝගයක්‌ බවට පත්ව ඇති මත්ද්‍රව්‍ය උවදුරෙන් සමාජය ගලවා ගැනීම සඳහා මෙවර මැතිවරණයට ඉදිරිපත් වන කාන්තා නියෝජිතවරියන් ඒකරාශී කර ගනිමින් මත්ද්‍රව්‍ය නිවාරණ බළකායක්‌ ගොඩනැඟීමට කටයුතු කරන අතර, අද රටේ කීර්තිනාමයට දැඩි හානියක්‌ව පවතින සියදිවි නසා ගැනීම්, වැළැක්‌වීම සඳහා තරුණ නියෝජිත නියෝජිතවරියන් ඒකරාශී කර ගනිමින් වැඩසටහනක්‌ ක්‍රියාත්මක කිරීමට අපේක්‍ෂා කරන බවද ජනාධිපතිතුමා සඳහන් කළේය.